وەزیرا ئه‌لمانی ژ لاڤرۆڤ را گۆت: تانکێن وە مرنێ تینن

وەزیرا دەرڤە یا ئه‌لمانیایێ گۆت، شەرێ رووسیایێ ل سەر دەرەوان هاتییە ئاڤاکرن. تەکەز کر ژی، مۆسکۆ مالێن ئوکراینیان بۆمبەباران دکەت.

ئەڤ یەک، دوهی د جڤینا ئاوارتە یا جڤاتا گشتی یا نەتەوێن یەکگرتی دا یا دەربارێ ئوکراینایێ دا هات کو نها ل بارەگەها نەتەوێن یەکگرتی ل نیۆیۆرکێ برێڤە دچیت.

وەزیرا ئه‌لمانی ئانالینا بێربوك د جڤینێ دا گۆت: «شەرێ رووسیایێ، شەرەکی ئێریشکاریێ یە و ل سەر دەرەوان هاتییە ئاڤاکرن. مۆسکۆ مالێن ئوکراینیان بۆمبەباران دکەت و تانکێن وێ ژی مرن و وێرانیێ تینن».

بێربۆك گۆتنێن خوە ئاراستەیی هەڤتایێ خوە یێ رووس سێرگی لاڤرۆڤ کر و گۆت: «برێز لاڤرۆڤ، هوون دکارن خوە بخاپینن، لێ هوون مە ناخاپینن، هوون نکارن گەلێ مە و گەلێ خوە ژی بخاپینن».

بەردەوام کر ژی: «نها ئەم ب بژاردەیەکێ را روو ب روونە، هەموو جیهان ل نەتەوێن یەکگرتی دنێریت و جیهانا مە دێ ئینیته‌ بیرا خوە کو ئەم ل کیژان ئالی راوەستیان».

دەربارێ رەوشا کۆچبەرێن ئوکراینی دا ژی، وەزیرا ئه‌لمانی گۆت: «دڤێ هەر هەموو کۆچبەرەک بێنە پاراستن، بێی جوداهیا دەربارێ نەتەوە، رەگەز و رەنگێ چەرمێ وان».

بێربۆك تەکەز کر: «بەرپرسیارییا پاراستنا نرخ و پرەنسیبێن وەک ئاشتی و دادپەروەریێ ل سەر ملێ نەتەوێن یەکگرتی یە. نها دەم گونجاوە ژ بۆ ئەم هەلوەستا خوە راگهینن و ئەم بەرپرسییار بن».

ئەندامێن جڤاتا گشتی یا نەتەوێن یەکگرتی کو ژ 193 وەلاتان پێک تێ، بریارە ئیرۆ چارشەمبێ ژی دەنگدانێ ل سەر پرۆژەبریارەکێ دەربارێ ئۆپەراسیۆنێن لەشکەری یێن رووسیایێ یێن کو نها ل ئوکراینایێ پێک تێن، بدن.

د روونشتنا دوهی یا جڤاتا گشتی دا، نوونەرێن پرانییا وەلاتێن ئەندام، رەدکرنا وەلاتێن خوە ل هەمبەر ئێریشا رووسیایێ ل سەر ئوکراینایێ نیشان دان.

هەروه‌ها نوونەرێن وەلاتان داخوازا راوەستاندنا بلەز یا شەر و ڤەکشینا هێزێن رووسی ژ ناڤا ئاخا ئوکراینایێ کرن.

بریارێن جڤاتا گشتی ب ئەرێکرنا 2/3 یا ئەندامێن جڤاتا گشتی تێن دەرخستن. لێ بەلێ ئەڤ بریار نە پابەندکەرن، گرنگییا وێ ئەوە کو ئیرادە و ئاراستەیێن جڤاکا ناڤدەولەتی نیشان ددەت.