لووتکەیا جەددە 10 ملیار دۆلار ژ بۆ ئاسایشا خوراکێ یا رۆژھلاتا ناڤین دابین دکە

 وەلاتێن لووتکەیا جەددە پابەندبوونا خوە ب پاراستنا ئاسایشا ھەرێمێ، زێدەکرنا ھناردەکرنا پەترۆلێ و دابینکرنا 10 ملیار دیناران ژ بۆ ئاسایشا خوراکێ نیشان ددن.

لووتکەیا جەددە ژ بۆ ئاسایش و گەشەپێدانێ ئیرۆ ل باژارێ جەددە یێ سعوودی دەست پێ کر و تێ دا پێشھاتێن ناڤچەیی و ناڤدەولەتی و رێیێن بەرفرەھکرنا ھەڤکاریێن د ناڤبەرا وەلاتێن بەشدار، ئانگۆ ئەنجوومەنا ھەڤکاریا کەنداڤێ، مسر، ئوردن و ئیراقێ دا، ب ئامادەبوونا سەرۆکێ ئامەریکا جۆ بایدن ھاتن گۆتووبێژکرن.

ل گۆر داخویانیا داویێ، سەرکردەیان پابەندبوونا خوە ب پێشخستنا ھەڤکاریا ھەڤبەش ژ بۆ پشتگریکرنا ھەولدانێن باشکرنا ئابۆرییا ناڤنەتەوەیی، چارەسەرکرنا باندۆرێن ئابۆری یێن نەرینی یێن پەژیکا کۆرۆنا و شەرێ ل ئوکراینایێ، ئەولەکاریا خوارن و ئەنەرژیێ و پێشخستنا چاڤکانیێن ئەنەرژیا پاقژ پشتراست کرن.

د داخویانیێ دا ھات گۆتن، کۆما ھەڤاھەنگیا عەرەبی بریار دا، 10 ملیار دۆلاران ژ بۆ پاراستنا ئاسایشا خوارنێ یێن ھەرێمی و ناڤنەتەوەیی دابین بکە.

وەلاتێن لووتکەیا جەددەیێ د داخویانیێ دا تەکەزی ل سەر پشتگریا بزاڤێن دیپلۆماتیکێن ب ئارمانجا نەھیشتنا ئالۆزیێن ناڤچەیی، کوورکرنا ھەڤکاریێن وان یێن بەرەڤانی، ئەولەکاری و ئستخباراتی و دابینکرنا ئازادی و ئەولەھیا رێیێن کەشتیێن دەریایی، کر.

سەرکردەیان پشتگیریا خوە ژ بۆ پاکژبوونا ناڤچەیا کەنداڤێ ژ ھەموو چەکێن کۆمکوژی پشتراست کرن و بال کشاندن سەر ناڤەندا خەباتێن دیپلۆماتیکێن ژ بۆ پێشیگرتنا ل چێکرنا چەکا ناڤۆکی یا ئیرانێ و رووبرووبوونا تێرۆرێ.

سەرکردەیان پێشوازیا دامەزراندنا ھێزا ئەرکێن ھەڤبەش 153 و ھێزا ئەرکێن ھەڤبەش 59 کرن، کو ھەڤکاری و ھەڤاھەنگیا بەرەڤانیێ د ناڤبەرا وەلاتێن ئەنجوومەنا ھەڤکاریا وەلاتێن عەرەبی یێن کەنداڤێ و فەرماندەھیا ناڤەندی یا ئامەریکایێ دا، زێدە دکە.