بنگەهێ پۆلیسان یێ سەختە ل ھندستانێ پشتی 8 مەھان ھات ئاشکەراکرن

پۆلیسێن ئەیالەتا «بیھار» یا ھندستانێ گرتنا ئەندامێن کۆمەکا تاوانبار راگھاند کو 8 مەھن ل یەک ژ ئۆتێلێن باژێری دا بنگەهەکێ پۆلیسان یێ سەختە ئاڤا کریە.

د ڤێ دەمێ دا ئەندامێن ڤێ کۆما تاوانبار جل و بەرگێن فەرمی یێن پۆلیسان ل خوە کرنە، چەک ھلگرتنە و تێ تەخمینکرن کو ژ سەدان کەسان پارە ستەندنە.

بنگەهێ ڤان چەتەیان 500 مەتران دووری مالا رێڤەبەرێ ئەولەکاریا وێ ھەرێمێ ھاتیە ئاڤاکرن.

پۆلیسان دا زانین کو ئەندامێن ڤێ کۆما تاوانبار ژ کەسێن کو ژ بۆ راگھاندن و تۆمارکرنا سکالایان ھاتنە ڤێ ناڤەندا پۆلیسان یا سەختە پارە دستینن و سۆز دانە ھنەکان کو د بەردێلا پارەیان دا ئالیکاریا وان بکن ژ بۆ پەیداکرنا خانی و دەلیڤێن کاری د ھێزێن پۆلیسان دا.

ئەڤ سەختەکاری ئاشکەرا بوو دەما پۆلیسەکێ دروست دیتی کو دو ئەندامێن ڤێ گرۆپا سەختەکار ل شوونا چەکێن فەرمی یێن پۆلیسان چەکێن کو ژ ئالیێ کارخانەیێن لۆکالی ڤە ھاتنە چێکرن ھلگرتنە.

پۆلیسان دیار کر کو وان ھەری کێم 6 ئەندامێن ڤێ گرۆپێ کو 2 ژێ ژنن دەستەسەر کرنە، لێ سەرچەتە ھێ ژی ئازادە و نەهاتیە گرتن.