ئیسرایلێ ئێریشی بارەگەھێن لەشکەری یێن ل سوێیدا و شامێ کر

د ئەنجاما ئێریشێن مووشەکی یێن ئیسرایلێ ل سەر دەردۆرا شاما پایتەخت و سوێیدایێ دە، 2 کەسان جانێ خوە ژ دەست دان.

ژێدەرەکی لەشکەری ژ “سانا” رە راگھاند: “ئیرۆ دەمژمێر دەردۆرا 00:15 ئیسرایلێ ژ ئالیێ دەڤەرا جۆلانێ ڤە ئێریشەکە ئاسمانی پێک ئانیە و ھن خالێن ل دەردۆرا شامێ و باشوورێ سووریێ کرن ئارمانج.

وی ژێدەری دەستنیشان کر ژی، سیستەما بەرەڤانیا ئاسمانی رووبروویی مووشەکان بوون و ھەژمارەک ژ وان تێک برن و خستن خوارێ.

ھەر وھا ئاشکەرە کر، د ئەنجاما ئێریشێ دە 2 کەسێن سڤیل ھاتن کوشتن و ھن زیانێن مادی چێبوون.

ژ ئالیێ خوە ڤە، رەوانگەھا سووری یا مافێن مرۆڤان راگھاند، ئسرایلێ خالێن میلیشیایێن ئیرانێ و ناڤەندێن بەرەڤانیا ئاسمانی یێن سووریێ ل تەل-ساحن یا ل گوندەوارێ سوێیدا، دەردۆرا فرۆکخانەیا ناڤدەولەتی یا شامێ، کۆمەگەھا ئیرانی ل دەڤەرا سەیدەت زێنەب و دەڤەرا کارگەھان ل دەڤەرا کسوێ کرن ئارمانج.

رەوانگەھێ گۆت ژی، مووشەکەک کو تێ تەخمینکرن یا بەرەڤانیا ئاسمانی یا سووریێ بە، ل کارگەھەکە جامێ یا ل دەڤەرا کسوێ ل باشوورێ شامێ کەت و 2 کەسان جانێ خوە ژ دەست دان.

ل گۆری زانیاریێن رەوانگەھێ، ژ دەستپێکا سالا 2023 ڤە، ئەڤ 10ەمین ئێریشا ئیسرایلێ ل ئاخا سووریێ یە.

پێر 2ێ نیسانێ د ئەنجاما ئێریشەکە مووشەکی یا ئیسرایلێ ل سەر پارێزگەھا حومسێ دە ژی ، 5 لەشکەرێن ئارتێشا سووریێ بریندار بووبوون.