فیدان: ئەردۆگان دێ ل ئیراقێ زێدەتری 20 پەیمانان ئیمزە بکە

وەزیرێ کارێن دەرڤەیێ ترکیەیێ راگهاند کو دێ د سەردانا ئەردۆگان يا ئیراقێ دە زێدەتری 20 پەیمانان وەرن ئیمزە کرن.

وەزیرێ کارێن دەرڤەیێ ترکیەیێ هاکان فیدان ئیرۆ ل ستەنبۆلێ پشتی هەڤدیتنا ب وەزیرێ کارێن دەرڤەیێ مۆریتانیایێ محه‌مه‌د سالم ولد مەرزوق رە جڤینەکە چاپەمەنیێ ل دار خست.

فیدان بەحسا سەردانا سەرۆککۆمارێ ترکیەیێ رەجەپ تاییپ ئەردۆگان یا ئیراق و هەرێما کوردستانێ کر و گۆت: «د سەردانێ دە سەرۆککۆمارێ ترکیەیێ دێ دەستپێکێ ب سەرۆکوەزیرێ ئیراقێ محەمەد شه‌یاع سوودانی رە بجڤه‌، پشتی وێ دێ زێدەتری 20 پەیمان د ناڤبەرا هەر دو ئالیان دە وەرن ئیمزەکرن».

فیدان هەروها راگهاند کو ئەو وەکی ترکیەیێ پشتگریێ ددن گاڤێن گەشەپێدانێ یێن حکوومەتا سوودانی.

وەزیرێ کارێن دەرڤەیێ ترکیەیێ هاکان فیدان گۆت: «رێکەفتنێن کو دێ چێببن دێ پێوەندیێن پاشەرۆژێ یێن هەر دو وەلاتان دەستنیشان بکن».

هاکان فیدان هەروها دا زانین کو ئەردۆگان د سەردانا هەولێرێ دە  دێب بەرپرسێن هەرێما کوردستانێ رە بجڤە و گۆت:«بهێزکرنا پێوەندیان دێ وەرە گۆتووبێژکرن، هەروها ژ بۆ ئاشتی و ئارامیا ناڤخوە یا ئیراقێ هنەک رۆلێن کو دکەڤن سەر ملێ وان هەنە ئەو دێ ڤێ یەکێ ژی گۆتووبێژ بکن».

وەزیرێ کارێن دەرڤەیێ ترکیەیێ هاکان فیدان هەروها ئانی زمان: «وەکی هوون دزانن ژ سالا 2011ێ ڤە جارا یەکەمە د ئاستا سەرۆککۆماریێ دە سەردانەکە وها چێدبە. دەمەکە درێژە هەم وەک ئالیێ ئیراقێ و هەم وەک ئالیێ ترکیەیێ گرنگی ب ڤێ سەردانێ تێ دایین و ئامادەکاری تێن کرن. ئەم دخوازن ل هەرێمێ پێوەندیەکە ل سەر بنگەها ئارامی و گەشەپێدانێ وەرە ئاڤاکرن. ل سەر ڤێ بنگەهێ د مژارێن وەکی ئەولەهی، ئەنەرژی، چاندنی، ئاڤ، بازرگانی، تەندورستی، پەروەردە و چەند مژارێن دن دە خەباتێن کو تێن مەشاندن هەنە».

هه‌ر وها گۆت: د ڤێ سەردانا سەرۆککۆمارێ مە دە زێدەتری 20 پەیمانێن کو دێ بێنە ئیمزەکرن نها ئامادەنە. دێ ئەو پەیمان سبە ب ئامادەهیا سەرکردەیێن سیاسی وەرن ئیمزەکرن».