چەتەیێن پەکەکێ “جوانێن شۆرەشگەر” ل منبجێ دو زارۆکێن دن رەڤاندن

تۆرا سووریێ یا مافێن مرۆڤان د دو راپۆرێن جودا دە ئەشکەرە کر کو رێخستنا جوانێن شۆرەشگەر یا گرێدایی پارتیا کارکەرێن کوردستانێ دو زارۆکێن تەمەن بچووک ژ باژارێ منبجێ ل پارێزگەھا حەلەبێ ل باکورێ سووریێ، کو د بن کۆنترۆلا ھێزێن سووریا دەمۆکراتیک دەیە، رەڤاندن.

تۆرا مافێن مرۆڤان گۆت کو “جوانێن شۆرەشگەر” زارۆکێ ب ناڤێ ھەمزە ئەل-عککام، 12 سالی، د 16ێ نیسانێ دە رەڤاندیە و ئەو ل کامپەکێ ب جھ کریە.

ل گۆری تۆرا مافێن مرۆڤان، ئەندامێن رێخستنا جوانێن شۆرەشگەر د 18ێ نیسانێ دە ژی زارۆکێ ب ناڤێ حسێن ئەحمەد ئەل-سبح ژ باژارێ منبجێ رەڤاند، حسێن د 6/1/2008 دە ژ داییک بوویە و خەلکێ گوندێ ئەل-دالیفارێیە، و ئەو ژێ ژ بۆی کامپەکە لەشکەری هاتیە برن.

تێ زانین فەرماندارێ ھێزێن سووریا دەمۆکراتیک مەزلووم کۆبانێ د سالا 2019 دە لگەل ڤێرجینیا گامبا نوونەرا نەتەوێن یەکگرتی بۆ کارووبارێن زارۆکان، ل سەر پەیمانەکێ ئیمزە کربوو، کو ئێدی زارۆکان تەڤلی ھێزێن خوە نەکە و زارۆکێن د ناڤ دە سەربەست بەردە، لێ تا نھا چ پابەندی ب وێ پەیمانێ نەھاتیە کرن، ھەر دەم چەکدارێن ب ناڤ و رەنگێن جودا د ناڤا هەسەدێ دە زارۆکان درەڤینن و تەڤلی لەشکەریا نەچاری دکن.

 ل گۆری چاڤدێران ئارمانجا چەتەیێن ب ناڤێ “جوانێن شۆرەشگەر” ژ رەڤاندنا زارۆکێن تەمەن بچووک، شووشتنا مەژیێ زارۆکان ل گۆر بیردۆزیێن پارتیا کارکەرێن کوردستانێ و تەڤلیکرنا وان د ناڤا رەفێن لەشکەری یێن پارتیێ دەیە.