ئیسرایلێ ل باشوورێ لوبنانێ ئۆتۆمۆبیلەک بۆمبەباران کر و ٢ کەس ھاتن کوشتن

ئیرۆ 9/5/2024 ئارتێشا ئیسرایلێ ل باشوورێ لوبنانێ ئۆتۆمۆبیلەک بۆمبەباران کر و د ئەنجامێ دە 2 کەس ھاتن کوشتن.

ئاژانسا نووچەیان یا رووسی بەلاڤ کر، کو ئیسرایلێ ب درۆنان ئۆتۆمۆبیلەک ل سەر رێیا ناڤچەیا بافیلەیا سەر ب قەزایا سورەیان ل باشوورێ لوبنانێ کریە ئارمانج و ژ بەر وێ ژی کوشتی و بریندار ھەنە.

ھەروەھا ئاژانسا سکای نیوز یا عەرەبی ژی راگەھاند، د وێ ئێریشێ دە 2 کەس ھاتنە کوشتن.

ژ دەما 7 جۆتمەھا 2023 دەستپێکرنا شەرێ د ناڤبەرا ئیسرایل و حەماسێ ھەتا نھا حزبوللاھا لوبنانێ ژی باکورێ ئیسرایلێ بۆمبەباران دکە و ئیسرایل ژی باشوورێ لوبنانێ بەردەوام بۆمبەباران دکە و ژ وێ دەمێ ھەتا نھا ب بۆمبەبارانێن ئیسرایلێ یێن ل سەر باشوورێ لوبنانێ 250 ئەندامێن حزبوللاھا لوبنانی ھەتا نھا ھاتنە کوشتن و ھەروھا 75 کەسێن سڤیل ھاتنە کوشتن. د بۆمبەبارانێن حزبوللاھا لوبنانێ یا ل سەر باکورێ ئیسرایلێ دە ژی نێزیکی 10 لەشکەرێن ئارتێشا ئیسرایلێ و ھندەک کەسێن سڤیل ھاتنە کوشتن.