ئارتێشا ئیسرایلێ ئامادەکاریێن ئێریشا بەژایی بۆ سەر لوبنانێ دکە

 ئارتێشا ئیسرایلێ ئامادەکاریان دکە کو بچە ناڤ ئاخا لوبنانێ و ئۆپەراسیۆنێن بەژاھی بکە. ھەمی ئالی و ھەتا ئامەریکا ژی ھایداریان ددە ئیسرایلێ کو، ئەڤ کارەکی باش نابە و د بەرژەوەندیا وێ دە نینە.

پشتی کوشتنا سەکرەتەرێ گشتی یێ حزبوللاھا لوبنانێ حەسەن نەسروللاهـ ژ ئالیێ ئیسرایلێ ڤە، نھا بەحسا چوونا ناڤ ئاخا لوبنانێ و ئۆپەراسیۆنێن بەژاھی تێ کرن. ئامەریکا ژی ھایداریێ ددە کو، کارەکی ژ وی رەنگی ئالیکاریا ڤەگەریانا ئیسرایلیان ژ بۆ مالێن وان ناکە.

راپۆرت ئاماژەیێ ددن ئامادەکاریێن ئارتێشا ئیسرایلێ ژ بۆ بجھانینا ئۆپەراسیۆنا بەژاھی ل دژی حزبوللاھێ ل ناڤ ئاخا لوبنانێ، ئەڤ ژی شەری دەربازی قۆناغەکە نوویا مەترسیدار دکە.

پێشتر ئارتێشا ئیسرایلێ چەند جاران ئامادەبوونا خوە ژ بۆ چوونا ناڤ ئاخا لوبنانێ و ئارمانجکرنا پێگەھێن حزبولاھێ دیار کریە. ھەرواھا دبێژە، “مە ئەزموونەکە گەلەک باش ژ شەرێ مەیدانی یێ غەزەیێ و ل دژی حەماسێ وەرگرتیە.”

ئارتێشا ئیسرایلێ دیار کر: “پلانەکە تەمام ژ بۆ ئێریشا بەژاھی یا ل سەر لوبنانێ ھاتیە دانان و راھێنانێن پێدڤی ژی ژ بۆ ڤێ ئارمانجێ ب سەربازان ھاتنە کرن.”

ئارمانجا وێ ئۆپەراسیۆنێ ژی گەرەنتیکرنا ئەولەھیا سنۆرێن ئیسرایلێ لگەل لوبنانێ و رێگرتنا ل ئێریشەکە وەکی یا 7/10/2023ێ ل سەر ئیسرایلێیە، ھەروەسا نەھێلانا پێگەھ و بنگەھێن حزبوللاھێ ل نێزی سنۆرێن ئیسرایلێیە، ژ بۆ کو وەلاتیێن دەڤەرێن باکوری بکارن ب سلامەتی و بێ ترس ڤەگەرن مالێن خوە.

ژ بۆ ڤێ مەرەمێ ژی، ئارتێشا ئیسرایلێ دو یەکینەیێن سەربازی ب ناڤێن ئیتزیۆنی و ئالۆن چێ کرنە و شاندنە سەر سنۆرێن وی وەلاتی.

حکوومەتا ئیسرایلێ ھەتا نھا ب ئاوایەکی فەرمی نیەتا خوە ژ بۆ ئۆپەراسیۆنا بەژاھی بۆ ناڤ ئاخا لوبنانێ دیار نەکریە، لێ ئاژانسا ئیسرایل ھیۆمێ پارڤە کریە، “نەتانیاھو و گالانت ھەفتیا بۆری رازیبوونا خوە ل سەر چوونا ناڤ ئاخا لوبنانێ ژ بۆ ھێزێن ئیسرایلێ دیار کریە.”

د عەینی دەمێ دە ئامەریکا و وەلاتێن دن ب ئاوایەکی بەرچاڤ چەند جاران ھایداری دایە کو، ئۆپەراسیۆنا بەژاھی بۆ ناڤ ئاخا لوبنانێ د بەرژەوەندیا ئیسرایلێ و ئەولەھیا دەڤەرێ دە نابە. کۆچکا سپی ژی ئاماژە دایە، شەرەکی سەرانسەری ل دژی ئیران و حزبوللاھێ ژ بۆ ڤەگەریانا ئاوارەیان بۆ ناڤ مال و حالێن وان ل باکورێ ئیسرایلێ ئالیکار نابە.