چار دەولەتێن زلهێز داخوازا راوەستاندنا شەرێ سووریەیێ دکن

 ئامەریکا، ئالمانیا، فرانسا و بریتانیایێ بەیاننامەیەکە ھەڤپار دەرخست و داخوازێ دکن کو شەرێ سووریەیێ بێ راوەستاندن و خەلکێ سڤیل و ژێرخانەیا وی وەلاتی بێن پاراستن.

ئەو بەیاننامە ژ ئالیێ وەزارەتا دەرڤەیا ئامەریکایێ ڤە ھاتیە پارڤەکرن و تێ دە ھاتیە، “زێدەبوونا ھەڤرکیێن سووریەیێ پێدڤیتی ب وێ یەکێ ھەیە کو سەرکردەتیا سیاسی یا سووریەیێ ب لەز وێ رەوشێ چارە بکە، کو لگەل بریارنامەیا ھەژمار 2254 یا جڤاتا ئەولەھیێ یا ناڤدەولەتی بگونجە.” ئەو بریارنامە ل سالا 2015 ل سەر پرۆسەیا ئاشتیێ یا سووریەیێ ژ ئالیێ نەتەوەیێن یەکگرتی ڤە ھاتیە پەژراندن.

وەزیرێ دەرڤەیێ ئامەریکایێ ئانتۆنی بلنکن دوھی (یەکشەمبێ، 1/12/2024) د پەیوەندیەکا تلەفۆنی دە لگەل وەزیرێ دەرڤەیێ ترکیەیێ ھاکان فیدان تەکەزی ل سەر “راوەستاندنا پێشڤەچوونان” ل سووریەیێ کر، پشتی کو کۆمێن چەکدار د چەند رۆژێن بۆری دە دەستێ خوە دانای سەر حەلەبێ.

رەوانگەھا سووریەیی یا مافێن مرۆڤان راگەھاندبوو، “کۆمێن چەکدار کو ژ ئالیێ ترکیەیێ ڤە پشتەڤانیا وان تێ کرن د کۆنترۆلکرنا ھەژمارەکە باژار و گوندێن حەلەبێ دە سەرکەفتی بوون.”

دەستەیا تەحریر شامێ و کۆمێن چەکدار یێن ھەڤپەیمانێن وێ ھەمی باژارێ حەلەبێ کۆنترۆل کر. د دەمەکێ دە کو ئارتێشا سووریەیێ سۆز دایە ھەمی وان دەڤەرێن کو کەفتنە بن دەستێ کۆمێن چەکدار دیسا کۆنترۆل بکە، نھا ژی زێدەتر ھێز ژ بۆ گوندێن حەلەب و حەمایێ ھاتنە ڤەگوھاستن.