وەزیرێ دەرڤەیێ ئیسرایلێ: دەستھلاتدارێن نوویێن سووریەیێ تەرۆریستن

وەزیرێ دەرڤەیێ ئیسرایلێ گیدۆن سار دبێژە، دەستھلاتدارێن نوویێن سووریەیێ، تۆرەکا تەرۆریستە و ئەڤە رەژیمەکا ئیسلامییە دخوازە تەڤاھیا سووریەیێ کۆنترۆل بکە.

وەزیرێ دەرڤەیێ ئیسرایلێ گیدۆن سار گۆت: “تشتێ کو ل سووریەیێ قەومیە، نە رادەستکرنا دەستھلاتێ ب ئاوایەکی ئاشتیانە بوو، لێ تۆرەکا تەرۆریست ژ ئدلبێ ھات و شام خست بن کۆنترۆلا خوە.”

سار ھەروھا گۆت: “راستە کو وەلاتێن رۆژئاڤا ب ئاوایێ رادەستکرنا دەستھلاتێ ل ور ب ئاشتیانە رازییە، لێ دڤێت ئەم ژ بیر نەکن کو ئەو نە سیستەمەکێ دەستھلاتداریێ یە کو ب ئاوایەکی دەمۆکراتیک ھاتیە ھلبژارتن.”

دا زانین ژی، “وەلاتێن رۆژئاڤا ب ھەیەجانن، ژ بەر کو ئەو دخوازن ئالیکاریا ئارامیێ و ڤەگەراندنا ب ملیۆنان پەنابەرێن سووری بکن. لێ رەوشا سووریەیێ دلنیایێ نادە و ئارامیەکا راستەقینە نینە.”

وەزیرێ دەرڤەیێ ئیسرایلێ گۆت ژی: “ل باژارێن پەراڤێ شەر و پەڤچوون ھەنە. گەفێن ئاشکەرەیێن سەرۆککۆمارێ ترکیەیێ رەجەب تەییب ئەردۆگان ژ بۆ ژناڤبرنا خوەسەریا کوردان ھەنە. دەستدرێژی ل کرستیانان تێ کرن، ژ بەر کو ئەڤە رەژیمەکا ئیسلامییە کو دخوازە تەڤاھیا سووریەیێ کۆنترۆل بکە.”

ئەڤ یەک د دەمەکێ دەیە، سەرۆکێ ھەیەت تەحریر ئەل-شام ئەحمەد شەرع بەری دو ھەفتەیان ب خوە ئاماژە ب وێ یەکێ کربوو کو حکوومەتا نوویا سووریەیێ لگەل ئیسرایلێ ناکەڤە ناڤ ناکۆکیان.

شەرع تەکەز کربوو: “سووریا ژ بەر شەرێ ب سالان، وەستیایە، رەوشا وێ ژی رێ نادە کەتنا ناڤ پەڤچوونێن نوو.” ئاماژە ب وێ ژی کربوو، “ئاڤاکرن و ئارامی پێشینەیێن سەرەکی نە.”