مهسروور بارزانی ل داڤۆسێ رهفۆرمێن ئابووری یێن كوردستانێ نیشان دده
سەرۆکێ حکوومەتا هەرێما کوردستانێ ژ بۆ تەڤلیبوونا د کۆربەندا ئابۆری یا جیهانی یا داڤۆسێ دە بەر ب سویسرایێ ڤە ب رێ کەت.
حکوومەتا هەرێما کوردستانێ د راگهاندنەکێ دە ئاماژە دا کو، سەرۆکێ حكوومهتا هەرێما کوردستانێ مەسروور بارزانی ئیرۆ (دوشەم، 19.01.2026) بەر ب سویسرایێ ڤە ب رێ کەت دا کو تەڤلی کۆربەندا ئابۆری یا جیهانی یا داڤۆسێ ببە.
ل گۆری وێ راگهاندنێ، سەرۆکوەزیرێ هەرێما کوردستانێ دێ هەژمارەکا جڤین و هەڤدیتنان ب سەرۆک، رێبەرێن پایەبلند و خوەدیێن کاران یێن جیهانی رە بکە، دا کو گوهەرتن و پێشهاتێن داویێ یێن هەرێما کوردستانێ، ئیراق و دەڤەرێ نیقاش بکە.
هەروەسا بەحسا رەفۆرمێن حكوومهتا هەرێما کوردستانێ د سەکتۆرێن جودا جودا دە ب ئارمانجا ئاڤاکرنا ژێرخانەیەکا ئابۆری یا ب هێز ل هەرێما کوردستانێ دکە.
گەرا 56ێ یا کۆربەندا ئابۆری یا جیهانێ ل داڤۆسێ ئیرۆ (دوشەم، 19.01.2026) ب تەڤلیبوونا زێدەتر ژ هەزار سەرۆک، رێبەر و رایەدارێن وەلاتان دێ بێ لدارخستن و هەتا رۆژا ئینێ (23ێ ڤێ مەهێ) دێ بەردەوام بە.
کەسێن تەڤلیبوویی دێ پێشنیار و چارەسەریێن خوە ژ بۆ رووبرووبوونا قەبخوازیێن هەیی پێشکێش بکن. ژ بلی ڤێ یەکێ ژی، د چارچۆڤەیا وێ کۆربەندێ دە ب دەهان پەیمانێن ئابۆری و ئەولەهیێ د ناڤبەرا حكوومهت و شیرکەتان دە دێ بێن ئیمزەکرن.
مژارێن کۆربەندێ
مژارا یەکێ یا ڤێ کۆربەندێ دێ بەرسڤا پرسیارا “ئەم چاوا دکارن د جیهانەکا پری پێشبرکێ دە ب هەڤ رە بخەبتن؟” بدە. د دەمەکێ دە کو دەولەتێن بهێزێن جیهانێ د پێشبرکێ و هەڤرکیێن دژوار و بەردەوام دەنە دا کو سەنگا هێزێ بگوهەرینن و هەژمۆنا خوە فەرز بکن، ئەڤ کۆربەند دخوازە ببە دەرگەهەک ژ بۆ خەباتا ب هەڤ رە، شیرکەت، حكوومهت و جڤاکا سڤیل دا کو چارەسەری و پێنگاڤێن پێدڤی ببینن.
مژارا دویێ دێ ل سەر “ئەم چاوا دکارن چاڤکانیێن نوویێن بەرفرەهبوونێ پەیدا بکن” باخڤە. ڤەدیتنا چارەسەریان ژ بۆ ڤێ پرسا گرینگ ژ بۆ شیرکەتان، حكوومهتان و خەلکی ب گشتی، ژ بەر کو لهەڤگوهەرتنا بازرگانی ژ بەر سیاسەتا نەپشتراستا وەلاتان و شەرێن ل گەلەک دەڤەرێن جیهانێ دژوار بوویە. وەلات سیاسەتا ئابۆری ژ بۆ سەپاندنا جەزایان وەکی چەک ژ بۆ رووبرووبوونا دژبەرێن خوە ب کار تینن.
مژارا سێیێ ل سەر گەفێن تەکنۆلۆژیێ یە، خاسما ژی ژیریا بدەستچێکری. د ڤێ چارچۆڤەیێ دە بال ل سەر ڤێ یەکێیە؛ “ئەم چاوا بکارن باشتر ڤەبەرهێنێ د مرۆڤان دە بکن؟” دا کو شیان و بەهرەیێن کتەکەسان پێش ڤە بچن و مەترسیێ ونداکرنا کار و بێکاریێ بێ کێمکرن، ژ بەر کو ل گۆری ئامارێن وێ کۆربەندێ، د پێنج سالێن بێ دە 22% دێ ل جیهانێ گوهەرتن د کاران دە چێ ببن، ب پرانی ژ بەر بکارانینا ژیریا بدەستچێکری ژ هێلا شیرکەت و حكوومهتان ڤە.
د مژارا چارێ دە، ئەڤ کۆربەند دێ بزاڤێ بکە کو بەرسڤا پرسیارا “ئەم چاوا دکارن داهێنانێ ب قەبارەیەکێ پێدڤی و بەرپرسیار بەلاڤ بکن؟” بدە. لەزا پێشکەفتنێ و سەپاندنا ژیریا بدەستچێکری هندە کو ببە مەترسی ل سەر ژیانا خەلکی، جڤاکێ، گوهەرتنا ژینگەهێ و سیاسەتا کارکرنا شیرکەت و پیشەسازیان. پرانیا وەلاتان ژی داخوازا سینۆردارکرنا بدەستخستنا زانیاران ژ ئالیێ ژیریا بدەستچێکری ڤە خاسما ژی زانیارێن شەخسی دکن.
مژارا پێنجێ یا کۆربەندا ئابۆری یا جیهانێ دێ نیقاشکرنا وێ یەکێ بە کا “ئەم چاوا دکارن د چارچۆڤەیا ئەولەهیا ئەردێ دە ژیارخوەشیێ ب دەست بخن؟”. گوهەرینا کەشووهەوایێ باندۆرەکا راستەراست ل سەر ژێرخانەیا ئابۆری، سیستەما خوارنێ و ئەکۆسیستەما خوەزایی چێ کریە. ڤێ یەکێ ژی وەسا کریە کو، هەوجەداریا چارەسەریا دۆستینیا ژینگەهێ زێدەتر بکە.
