شامێ نوونەرەکی تایبەت ژ بۆ جیبجیکرنا رێکەفتنا لگەل ھەسەدێ دیار کر
سەرۆکاتیا کۆمارا سووریەیێ، عەمید زیاد عایێش وەکی نوونەرێ سەرۆکاتیێ ژ بۆ جبجیکرنا خالێن رێکەفتنا 29ێ چلەیێ یا لگەل ھێزێن سووریەیا دەمۆکراتیک (ھەسەدێ)، دەستنیشان کر.
رێڤەبەریا راگھاندنێ یا سەرۆکاتیا کۆمارێ ژ بۆ ئاژانسا فەرمی یا سووریەیێ (سانا) راگھاند، عەمید زیاد عایێش وەکی نوونەرێ تایبەتێ سەرۆکاتیێ ھاتیە دیارکرن، ژ بۆ خالێن رێکەفتنا 29ێ چلەیێ یا لگەل ھەسدەێ جیبجی بکە و پرۆسەیا “یەکبوونێ” بشۆپینە.
ل گۆری داخویانیێ، نوونەرێ نوو دێ کار ل سەر راکرنا ئاستەنگێن ل بەر جیبجیکرنا رێکەفتنا 29ێ چلەیێ بکە و دێ ھەول بدە ھەبوونا دەولەتێ ل ھەرێمێ خورتتر بکە و سازیێن خزمەتگوزاریێ ژ بۆ وەلاتیان جارەکە دن چالاک بکە.
حکوومەتا سووریەیێ و ھەسەدێ رۆژا 29ێ چلەیا 2026ێ داخویانیەکا چاپەمەنیێ بەلاڤ کرن و تێ دە راگھاندن، وان ل سەر ‘رێکەفتنەکا بەرفرەھ’ یا ئاگربەستێ و پرۆسەیەکا یەککرنا قۆناغ ب قۆناغ یا ھێزێن لەشکەری و ئیداری ل ھەڤ کرنە.
د چارچۆڤەیا ڤێ رێکەفتنێ دە ژی، ژ رۆژا 2 شوباتێ ڤە جبجیکرنا خالێن رێکەفتنێ کەتنە وارێ جبجیکرنێ و ھێزەک ئەولەھیێ یا حکوومەتێ دەرباسی ناڤەندا باژارێن حەسەکێ، قامشلۆ بوو.
وەکی بەشەک ژ ڤێ رێکەفتنێ ژی، بەری چەند رۆژان، سازیا گشتی یا فرۆکڤانیا سڤیل یا سووریەیێ ب فەرمی رێڤەبەری و خەباتێن فۆرکخانەیا قامشلۆ وەرگرتبوون.
زیاد عایێش کییە؟
زیاد عایێش د سالا 1987ێ دە ژ دایک بوویە. ئەو ب ئەسلێ خوە ژ گوندێ ئەرجە ئەل-جەوالایا ل گوندەوارێ باشوورێ رۆژھلاتێ قامشلۆیە. عایێش بەرێ وەکی ئەندامەکی چالاک د کۆمیتەیا دانوستاندنانا لگەل ھەسەدێ جھ گرتبوو.
