حکوومەتا سووریەیێ کامپا ھۆلێ گرت

کامپا ھۆلێ یا ل حەسەکێ کو ب ھەزاران مالباتێن چەکدارێن داعشێ تێ دە بجھ دبن، ب فەرمی ھات گرتن.

حکوومەتێ سووریەیێ گرتنا ماییندەیا کامپا ھۆلێ راگھاند، کو ئەڤ کامپ وەکی ناڤەندا ھەری مەزن یا راگرتنا مالباتێن چەکدارێن داعشێ دھات ناسکرن. ئەڤ بریار پشتی وێ یەکێ ھات کو بەشەک ژ نشتەجھێن روونشتڤانێن کامپێ د دەما بۆری رەڤیابوون و یێن مایی ژی بەر ب کامپێن ل گوندەوارێ حەلەبێ ڤە ھاتن ڤەگوھەستن.

چاڤکانیەکێ ژ رێخستنەکا ناڤدەولەتی کو د ھوندرێ کامپێ دە کار دکە، ژ مەدیایێ رە راگھاند: “ب ڤەکشینا ھێزێن سووریەیا دەمۆکراتیک (ھەسەدێ) و ھاتنا چەکدارێن عەشیران و ھێزێن حکوومەتێ، نێزی 2 ھەزار مالباتێن ئیراقی ژ کامپێ رەڤیانە.”

ھەمان چاڤکانیێ دیار کر، بەشا تایبەتا مالباتێن بیانی، د دو رۆژێن دەستپێکێ یێن ڤەکشینا ھەسەدێ دە، ژ کامپێ دەرکەتن. پرانیا ڤان مالباتان ب ئالیکاریا ھندەک کەسێن کو دەرباسی کامپێ بوونە، بەر ب ھەرێمێن ئیدلب و حەلەبێ ڤە رەڤیانە. ھات راگھاندن کو ھندەک ژ وان ژی ب رێیێن قاچاخ دەرباسی ئاخا ئیراق و لبنانێ بوونە.

ل گۆری ئاگاھیان، پرانیا مالباتێن ئیراقی یێن کو ژ کامپێ رەڤیانە، ب رێیێن قاچاخ ڤەگەریانە ئیراقێ. ھندەکێن دن ژی کو ب وەلاتیێن سووریەیی رە زەوجیبوون، ل ھەرێمێن جودایێن سووریەیێ بجھ بوونە. حکوومەتا سووریەیێ ئەو مالباتێن ئیراقی یێن کو نەخوەستنە ڤەگەرن وەلاتێ خوە، بۆ کامپا “ئەق بورھان”یا ل گوندەوارێ حەلەبێ ڤەگوھەستنە.

رێخستنا “یەکەیا پشتگریا ئارامیێ” کو رێخستنەکە نەحکوومییە، راگھاند کو کاروانا داوی یا مالباتان ژ کامپێ دەرکەتیە. رێخستنێ دا زانین، ب پشتگریا UNHCR، وان کارێ ڤەگەراندنا مالباتان بۆ ھەرێمێن وان کرنە. ھەر وھا UNHCR پشتراست کر کو د داویا مەھا چلەیێ یا سالا 2026ێ دە، 191 وەلاتیێن ئیراقی ژ کامپێ ڤەگەریانە وەلاتێ خوە.

کامپا ھۆلێ کو بەرێ نێزی 24 ھەزار کەس تێ دە بوون (2 ھەزار ئیراقی، 15 ھەزار سووری و 6 ھەزار و 300 ژن و زارۆکێن بیانی ژ 42 نەتەوەیێن جودا)، ھەر تم وەکی مەترسیەکە مەزنا ئەولەھیێ دھات دیتن.

ھێزێن سووریەیا دەمۆکراتیک (ھەسەدێ) گەلەک جاران بانگ ل وەلاتێن جیھانێ کربوو کو ھەموەلاتیێن خوەیێن ئەندامێن داعشێ وەربگرن، لێ ژ بەر مەترسیێن سیاسی و ئەولەھیێ پرانیا وەلاتان خوە ژ ڤێ بەرپرسیاریێ ڤەدزین.