جەنگیز چاندار: یاسایێن پێڤاژۆیا ئاشتیێ دێ د گولان یان خزیرانێ دە بێن دەرخستن
پارلامەنتەرێ دەم پارتیێ جەنگیز چاندار راگھاند، ئامادەکاریێن یاسایی ژ بۆ پێڤاژۆیا ئاشتیێ بەردەوام دکن و تێ پایین کو پاکێتا یاسایان د مەھێن گولان یان ژی خزیرانێ دە وەرە پارلامەنتۆیێ.
پارلامەنتەرێ پارتیا گەلانا وەکھەڤی و دەمۆکراسیێ (دەم پارتی)یێ دیاربەکرێ جەنگیز چاندار بەشداری بەرنامەیەکە تەلەڤیزیۆنێ بوو و دەربارێ قۆناغا نوویا “پێڤاژۆیا ئاشتیێ” دە دەستنیشان کر، دەرخستنا یاسایان د مەھا نیسانێ دە، نە پێکانە، لێ ئەگەرا ھەری مەزن ئەوە کو د مەھێن گولان یان خزیرانێ دە گاڤێن یاسایی وەرن ئاڤێتن.
جەنگیز چاندار دەربارێ ناڤەرۆکا یاسایێن کو تێ چاڤەرێکرن بێن ئامادەکرن دە گۆت: “ب ڤان یاسایان رە، دێ رێ ل بەر ڤەگەرا کەسێن ل چیا ڤەکە، داکو تەڤلی ژیانا دەمۆکراتیک ببن. ھەروھا ڤالاکرنا گرتیگەھان و ڤەگەرا کەسێن کو ل ئەورۆپایێ د دەربەدەریێ دە نە ژی د ناڤ رۆژەڤا ڤێ پێڤاژۆیێ دەیە.”
ئەڤ داخویانیا جەنگیز چاندار د دەمەکێ دە تێ، جیگرێ سەرۆکۆمارێ ترکیەیێ جەودەت یلماز د سەردانا خوەیا دو رۆژی یا ل دیاربەکرێ دە پەیامێن گەرم دابوون. یلماز د “جڤینا جیھانا کار” دە ئەشکەرە کربوو، ژ بەر گەشەدانێن ل سووریە و ئیرانێ، پێدڤیا ترکیەیێ ب ئاشتیەکا ناڤخوە زێدەتر بوویە.
جەودەت یلماز ل دیاربەکرێ سۆز دابوو کو حکوومەت دێ “لەزێ بدە پێڤاژۆیێ و گاڤێن یاسایی بھاڤێژە.” یلماز ھەروھا بانگ ل دەم پارتیێ کربوو کو ژ بۆ سەرکەفتنا پێڤاژۆیێ بەرپرسیاریێ ھلدە سەر ملێ خوە و تەکەزی ل سەر “چەکدانینێ” کربوو.
