جەودەت یلماز: دڤێت دەم پارتی دیار بکە کا دێ چ ژ بۆ پێڤاژۆیێ بکە
جیگرێ سەرۆککۆمارێ ترکیەیێ جەودەت یلماز، د چارچۆڤەیا سەردانا خوەیا دو رۆژی یا ل ئامەدێ دە، پەیامێن ستراتەژیک دەربارێ “پێڤاژۆیا ئاشتیا ناڤخوە”، گەشەدانێن ھەرێمی و ھەلوەستا دەم پارتیێ دە دان. یلماز تەکەز کر کو پشتی روودانێن ل سووریە و ئیرانێ، پێدڤیا ترکیەیێ ب ئارامیەکە ماییندە ھین زێدەتر بوویە و راگھاند کو ئەوێ د نێز دە لەزێ بدن گاڤێن یاسایی.
جەودەت یلماز د “جڤینا جیھانا کار” دە ل گەل نوونەرێن کارسازان و جڤاکا سڤیل جڤیا. یلماز دیار کر کو وان رێ نەدا روودانێن ل سووریەیێ و شەرێ ل سەر ئیرانێ ببن سەدەما پرۆڤۆکاسیۆنان ل ھوندرێ ترکیەیێ. وی دەستنیشان کر کو ئەڤ گەشەدانێن ل وەلاتێن جیران گرنگیا “پێڤاژۆیا ئاشتیێ” ھین زێدەتر نیشان دانە و گۆت: “پشتی ڤێ قۆناغێ، ئەم دێ لەزێ بدن پێڤاژۆیێ و گاڤێن یاسایی یێن پێویست بھاڤێژن.”
جیگرێ سەرۆکۆمار د ئاخافتنا خوە دە رەخنە ل ھەلوەستا دەم پارتیێ گرتن و بانگ ل وان کر کو پتر ئەکتیف بن. یلماز ئانی زمان کو ل شوونا کو دەم پارتی داخوازان ژ سازیێن دەولەتێ بکە، دڤێت ژ خوە بپرسە کا ئەو دکارە چ ژ بۆ سەرکەفتنا پێڤاژۆیێ بکە. یلماز ب تایبەتی ل سەر مژارا چەکدانینێ راوەستا و گۆت: “دڤێت ب ئاوایەکی تەکەز وەرە دیتن کو چەک ھاتنە دانین. پێشخستنا دەمۆکراسیێ ژ بۆ چەکدانینێ نە مەرجە.”
یلماز ھەروھا بال کشاند سەر شەرێ کو ب ھاندانا ئیسرایلێ ل دژی ئیرانێ دەست پێ کریە و دیار کر کو ڤی شەری باندۆرەکە گران ل ئابۆریا ھەرێمێ کریە. وی تەکەز کر کو ترکیە یەکپارچەییا ئاخا ئیرانێ و سەروەریا وێ دپارێزە و داخواز کر کو شەر دەملدەست ب داوی ببە داکو زیانێن زێدەتر نەیێن دیتن.
