ئەنجوومەنا ھەڤکاریا کەنداڤێ: مافێ مەیێ یاسایییە کو بەرسڤا دەستدرێژیێن ئیرانێ بدن
ئەنجوومەنا ھەڤکاریا وەلاتێن کەنداڤێ راگھاند، ئەولەھیا وەلاتێن ئەندام نایێ دابەشکرن و ھەر ئێریشەکا ل سەر وەلاتەکی وان، وەک ئێریشا ل سەر تەڤاھیا ئەنجوومەنێ تێ ھەژمارتن. ھەروھا تەکەزی ل سەر مافێ خوەیێ یاسایی کرن ژ بۆ بەرسڤدایینا دەستدرێژیێن ئیرانێ.
د داویا جڤینا وەلاتێن ئەندام دە کو دوھ 1ێ ئادارێ ھات ئەنجامدان، ئەنجوومەنا وەزیران یا ئەنجوومەنێ د داخویانیەکێ دە راگھاند: “وەلاتێن ئەندام خوەدی ھەلوەستەکا یەکگرتی نە د رووبرووبوونا ڤان ئێریشان دە. مافێ مەیێ یاسایییە کو ئەم ھەموو رێکارێن پێویست بگرن ژ بۆ پاراستنا سەروەری، ئاساییش و ئارامیا ئاخ و وەلاتیێن خوە.”
د داخویانیێ دە ھات دیارکرن، ل گۆری میساقا ئەنجوومەنا کەنداڤێ و رێکەفتنا پاراستنا ھەڤبەش، ھەر دەستدرێژیەک ل سەر وەلاتەکی ئەندام وەک ئێریشەکا راستەراست ل سەر ھەموویان تێ دیتن. ئەنجوومەنێ بال کشاند سەر مادەیا 51ێ یا بەلگەنامەیا نەتەوەیێن یەکگرتی، کو مافێ پاراستنا تاکەکەسی و کۆمی د دەما دەستدرێژیێ دە ژ بۆ وەلاتان گارانتی کریە.
ئەنجوومەنێ ب توندی ئێریشێن ئیرانێ یێن ل سەر وەلاتێن کەنداڤێ و شاھنشینا ئوردنێ شەرمەزار کرن. د داخویانیێ دە ھات گۆتن: “ئەڤ ئێریش بنپێکرنا ئەشکەرە یا پرەنسیبێن جیرانتیا باش و یاسایێن ناڤدەولەتی نە. ئارمانجگرتنا بنەسازیا سڤیل و دەڤەرێن نشتەجھبوونێ، تاوانا مرۆڤییە و زیانێن مادی یێن مەزن ل پەی خوە ھیشتنە و بوویە سەدەما توندووتووژیا ل دژی وەلاتیێن بێگونەھ.”
ئەنجوومەنا کەنداڤێ تەکەز کر، ئارامیا ھەرێمێ نە تەنێ مژارەکە ناڤخوەیییە، لێ بەلێ ستوونەکە سەرەکییە ژ بۆ ئابۆریا جیھانێ. داخوازا راوەستاندنا یەکسەرا ئێریشان کر ژ بۆ پاراستنا رێیێن ئاڤی و مسۆگەرکرنا ئارامیا بازارێن ئەنەرژیێ و زنجیرا دابینکرنا جیھانی.
تەڤی تەکەزیا ل سەر مافێ پاراستنێ، ئەنجوومەنێ دیار کر کو ئەو ھەر تم بژاردەیا دیالۆگ و دیپلۆماسیێ لگەل ئیرانێ ژ بۆ چارەسەرکرنا کێشەیان، بژاردەیا باشە و د ڤێ چارچۆڤەیێ دە پەسنێ رۆلا سەلتەننیشینا عۆمانێ دان.
د ھەمان دەمێ دە داخواز ژ ئەنجوومەنا ئەولەکاریێ یا نەتەوەیێن یەکگرتی ھات کرن کو بەرپرسیاریا خوە ھلگرە و ھەلوەستەکە یەکالیکەر بگرە، ژ بۆ رێگرتنا ل دوبارەبوونا ڤان بنپێکرنان کو ئاشتی و ئاساییشا جیھانێ دخن مەترسیێ.
د داویا داخویانیێ دە، ئەنجوومەنێ دەستخوەشی ل شیان و ئامادەباشیا ھێزێن چەکدار و سیستەمێن پاراستنا ئاسمانی یێن وەلاتێن ئەندام کر، کو کارینە ب پرۆفیشنالیەکا بلند رووبروویی ئێریشێن مووشەکی و درۆنان ببن و مەترسیان کێم بکن.
