ئەلمانیا، فرانسا و بریتانیا: ئەم دێ شیانێن مووشەکی یێن ئیرانێ ژناڤ ببن
ھەر سێ وەلاتێن مەزن یێن ئەورۆپایێ د داخویانیەکا ھەڤبەش دە راگھاندن، ئەو ئامادە نە رێکارێن لەشکەری یێن بەرەڤانیێ بگرن، ژ بۆ ژناڤبرنا چاڤکانیێن شیانێن مووشەکی و درۆنی یێن ئیرانێ.
ئەلمانیا، فرانسا و بریتانیایێ ئیرۆ 2یێ ئادارێ د داخویانیەکا ھەڤبەش دە راگھاندن: “ئێریشێن مووشەکی یێن ئیرانێ ب ئاوایەکی سەربەردایی ھەڤالبەندێن مە، ھێزێن مەیێن چەکدار و وەلاتیێن سڤیل ل سەرانسەرێ ناڤچەیێ کرنە ئارمانج.” ھەر سێ پایتەختێن ئەورۆپی دیار کرن کو ئارمانجا وان یا سەرەکی، رێگرتنا ل تەھرانێیە ژ بۆ ئاڤێتنا مووشەک و درۆنان.
ئەڤ بریارا ئەورۆپایێ پشتی وێ یەکێ تێ، ئیرانێ د بەرسڤا ئێریشێن ئامەریکا و ئیسرایلێ دە، گەلەک ئێریش برن سەر وەلاتێن جیران و ئیسرایلێ. ل گۆری زانیاریان، تەنێ ل ئیسرایلێ 9 کەسان ژیانا خوە ژ دەست دایە. د ھەمان دەمێ دە، واشنگتۆنێ راگھاند، 3 سەربازێن وان د ئەنجاما ڤان ئێریشان دە ھاتنە کوشتن.
سەرۆکوەزیرێ بریتانیایێ کێیر ستارمەر، د پەیامەکە ڤیدیۆیی دە ل سەر تۆرا جڤاکی “X” راگھاند، وەلاتێ وی داخوازا ئامەریکایێ یا ژ بۆ بکارئانینا بنگەھێن لەشکەری یێن بریتانیایێ قەبوول کریە. ستارمەر گۆت: “مە دەستوور دایە کو بنگەھێن مە ژ بۆ مەبەستێن بەرەڤانیێ یێن تایبەت و سینۆردار وەرن بکارئانین، دا کو ئەم رێ ل بەر ئیرانێ بگرن کو مووشەکان نەهاڤێژە ھەرێمێ و ئەم کۆمگەھان و جھێن ئاڤێتنا مووشەکێن وان تێک ببن.””
د داویا داخویانیێ دە، بەرلین، پاریس و لۆندن تەکەز کرن کو ئەو لگەل واشنگتۆن و ھەڤالبەندێن ناڤچەیێ د ناڤ گۆتووبێژێن بەردەوام دە نە، ژ بۆ نرخاندنا رەوشێ و بجھکرنا رێکارێن بەرەڤانیێ یێن پێویست ژ بۆ ئارامیا ھەرێمێ.
