ئامەریکا: 3 فرۆکەیێن مەیێن شەری کەتنە خوارێ
فەرمانداریا ناڤەندی یا ھێزێن ئامەریکایێ (سێنتکۆم) راگھاند، سێ فرۆکەیێن وان یێن شەری یێن ژ جورەیێ F15، ل ئاسمانێ کووەیتێ ب خەلەتی ژ ئالیێ سیستەما بەرەڤانیا ئاسمانی یا وی وەلاتی ڤە ھاتنە خستن.
سێنتکۆمێ ئیرۆ 2یێ ئادارێ د داخویانیەکێ دە راگھاند، سێ فرۆکەیێن شەری یێن ئامەریکایێ ل ئاسمانێ کووەیتێ، د ئەنجاما “تەقەیا دۆستانە” دە ژ ئالیێ ھێزێن کووەیتی ڤە ھاتنە تێکبرن.
دیار کر ژی، بوویەر شەڤا بۆری 1ێ ئادارێ پێک ھاتیە. فرۆکە ژ جورەیا (F15) بوون و د چارچۆڤەیا ئۆپەراسیۆنا “داستان-ئاسا” دە ئەرکێ خوە ب جھ دانین.
سێنتکۆمێ ئاشکەرە کر، د وێ کێلیێ دە شەرەکی چالاک ھەبوو و ئیرانێ ب مووشەکێن بالیستیک و درۆنان ئێریشی ھەرێمێ دکر؛ ژ بەر ڤێ ئالۆزیێ، سیستەما پاراستنا ئاسمانی یا کووەیتێ فرۆکەیێن ئامەریکایێ وەک ئارمانجێن دژمن دیتنە و ل وان خستنە.
دەربارێ رەوشا تیمێن فرۆکەیان دە، سێنتکۆمێ راگھاند، ھەر شەش ئەندامێن تیمێ (پیلۆت و ئالیکارێن وان) کارینە ب سیستەما ئاڤێتنێ خوە ژ فرۆکەیان رزگار بکن. ھات دیارکرن کو ھەر شەش پیلۆت ھاتنە دیتن و رەوشا وانا تەندورستیێ نھا باش و جیگرە.
د داخویانیێ دە ھات گۆتن، دەولەتا کووەیتێ ب فەرمی راگھاندیە کو ئەڤ بوویەر ب خەلەتی چێبوویە. سێنتکۆمێ تەڤی ڤێ بوویەرێ، سپاسیا ھەولدانێن ھێزێن بەرەڤانیێ یێن کووەیتێ کر کو د پاراستنا ھەرێمێ دە چالاکن. ھات راگھاندن کو لێکۆلینەکا ھوور و کوور ژ بۆ رۆنیکرنا ھەموو ھوورگلیێن ڤێ بوویەرا نەخوەستی دەست پێ کریە.
