ئۆپەراسیۆنا ئامەریکا و ئیسرایلێ یا ل دژی ئیرانێ د 1ێ ئادارێ دە نیشان ددە کو ئەڤ بھار دێ بھارەک دژوار بە، ھەم خەتەرە و ھەم ژی دەرفەتێن مەزن پێشکێش دکە.
رەژیما ئیسلامی یا ئیرانێ ژ سالا 1979ێ ڤر ڤە جارا یەکەمە دەربەیەک ئەوقاس مەزن خواریە و ھلوەشینا وێ نیزێکە. پشتی شۆکا دەستپێکێ، ئیران نھا ھەول ددە کو ھەناسەکێ بستینە و وەخت دەست بخە. ژ ئالیەکی ڤە، ب ھێزێن خوەیێن وەکیل، وەک حەشدا شەعبی، توندوتیژیێ ب ئاوایەکی کۆنترۆلکری زێدە دکە و ھەول ددە کو رۆژھلاتا ناڤین تەڤلیھەڤ بکە. ژ ئالیێ دن ڤە، ھەول ددە کو ب ئیشارەتکرنا ھێزێن کو ل دژی ئۆپەراسیۆنێنە وەها نیشان بدە کو ئەو ب تەڤاھی نەھاتیە ھلوەشاندن، و ھێزا خوە نیشان بدە.
پێڤاژۆیا ل ئیرانێ چاوا پێش دکەڤە نە دیارە. ئیران ھەم ل سەر سیستەمەک ئۆلی-تەریقەتی و ھەم ژی ل سەر کەڤنەشۆپیا دەولەتا پارس وێ تەڤبگەرە، یانی ل شوونا ھلوەشینێ، ھەول ددە خوە نەرمبکە داکو ھەیا رادەیەکێ دەستھلاتا خوە بپارێزە.
ھێزێن کو بەشداری ئۆپەراسیۆنێ بوونە ژی ستراتەژیەک بەربچاڤ ژ بۆ ئیرانێ تونە نە. نە دیارە کو ئارمانج ھلوەشاندنا تەڤاھییا رەژیمێیە یان ژی قەلسکرنا وێ و نەچارکرنا وێ بوو تەسلیمبوونێیە. ھەتا ھێزێن جیھانی ژی ھشیارن. ھەر کەس ھەول ددە باندۆرا جیھانی یا شەری بنرخینە و خوە ل گۆری وێ ب جھ بکە. دڤێت کورد ژی ھەمان تشتی بکن. دڤێت ھەم وێرەک و ھەم ژی ھشیار بن. و رۆژھلاتێ کوردستانێ دڤێت ژ رۆژئاڤا دەرسان وەربگرە. دڤێت ژ دوبارەکرنا ھەمان خەلەتیان دوور بسەکنە و پەکەکێ ژ رۆژھلات دوور بخە.
ل رۆژئاڤا، کورد ل گۆری بەرژەوەندیێن خوەیێن بەربچاڤ تەڤنەگەریان. ئەو ل گۆری فکرا ئایدۆلۆژیکا ئۆجالان و پەکەکێ تەڤگەریان. ل رۆژئاڤا، کوردان ب ئارمانجا دەمۆکراتیککرنا تەڤاھیا سووریێ، ھەتا تەڤاھیا رۆژھلاتا ناڤین و رێیا سێیەمین… رێبازا خوە وەندا کر. نێزیکی 15.000 جوانێن کورد ل دەرڤەیی ھەرێمێن کورد و ژ بۆ ئارمانجێن نەکورد ھاتن کوشتن. گەل 13 سالان وێرانیەکە مەزن کشاند. ب ئاخافتنا بەردەواما ل سەر سووریەیەکاە دەمۆکراتیک، د داویێ دە ب ئاوایەکی تەڤلیھەڤ تەڤلی سووریێ بوون.
رۆژھلات نکارە ڤێ یەکێ بکە. دڤێت رۆژھلات پلانێن پەرگالا سیاسی یا جیھانێ ژ بۆ رەژیما ئیرانێ بشۆپینە. و دڤێت نەرینێن ل سەر رەژیمێ ب زەلالی وەرن دیارکرن؛ دڤێت ب ھێزێن خوە، باژارێن کوردان وەختەکی راست و دەقیق رزگار بکە. نە درەنگ بمینە و نە ژی زوو پێشرەوی بکە. دڤێت ئارمانجێن زەلال داخواز بکە و خوەرێڤەبەریا کوردان مسۆگەر بکە. گوھ نەدە گۆتە-گۆتکێن “رێیا سێیەمین”، ئیرانا دەمۆکراتیک و ھتد. ئەڤ یەک دێ ب رۆژھلات بدە ونداکرن. رێخستنێن رۆژھلات دڤێت رەقابەتێن خوەیێن ناڤخوەیی بدن ئالیەکی و ل دۆرا گۆتارەکا کورد و کوردستانی ببن یەک.
دڤێت ب تایبەتی ل دژی پژاکێ ھشیار بن. پەکەکە دخوازە ب ڤی ناڤی بکەڤە رۆژھلات، پژاکێ وەکی ھەسپێ ترۆیایێ بکار بینە. پشتی کو ل باکور وندا کر، ل باشوور ھەموو سەنگەرێن خوە رادەستی ترکیێ کرن و رۆژئاڤا ب ناڤێ “ئەنتەگراسیۆنێ” ژناڤ بر، ڤێجا پەکەکە دخوازە ھەبوونا خوە ل رۆژھلات درێژ بکە.
کەتنا پەکەکێ یا رۆژھلات ب ناڤێ پژاکێ تێ واتەیا دەستوەردانا ئۆجالان و بێ گومان، دەستوەردانا ژ ئالیێ ترکیەیێ ڤە د کارووبارێن کوردێن رۆژھلات دە. ژخوە، پارتیا دەم و ھەڤسەرۆکێن وێ، توولای ھاتمۆغلاری، ب گۆتنێن ل سەر “ئیرانا دەمۆکراتیک” و ھتد ئارمانجێن کوردان شۆلی دکن. رۆژھلات دڤێت پەکەکێ ئاستەنگ بکە دا کو پێشەرۆژا خوەیا ئازاد مسۆگەر بکە.
ھێزێن رۆژھلات، ب ھەلوەستەکا کوردی، دڤێت دەستپێکێ د ناڤبەرا خوە دە و دووڤ را ژی لگەل ھێزێن ب باندۆر ل سەر بنگەھا داخوازێن سەروەرییا کوردان ھەڤپەیمانیان چێبکن. سەرکەفتنا رۆژھلاتێ کوردستانێ تێ واتەیا تێکچوونا سیستەما کۆلۆنیالا سەدسالی لسەر کوردان ھاتیە سەپاندن. رۆژ ل رۆژھلات ھلتێ.
