ل رۆژئاڤایێ کوردستانێ پێڤاژۆیا کو د سالا 2011ێ دە لگەل بوھارا عەرەبی دەست پێ کربوو، د 29ێ سباتا 2026ێ دە ب پەیمانا کو د ناڤبەرا شام و ھێزێن ھەسەدێ دە ھاتیە ئیمزاکرن ب داوی بوو.
لگەل پەیمانا 29ێ سباتێ، ل رۆژئاڤا ھەموو دەولەمەندیێن بن ئەرد و سەر ئەرد، پێکھاتەیێن ئیداری-لەشکەری و سازییێن فەرمی رادەستی رەژمێ ھاتن کرن. تشتێ تەنێ کو نەھات رادەستکرن دەستھلاتداریا کادرۆیان بوو، یا کو پەکەکێ ل دوو خوە ھشتی.
لگەل بوھارا عەرەبی، پەکەکێ ب سالان کادرۆیێن خوەیێن کو ل قەندیلێ، کامپا مەخموورێ و ھەرێمێن دن یێن باشوور کۆم کربوون، حەرکاندن رۆژئاڤا. ئەڤ کادرۆ ل رۆژئاڤا کەتن سەر ھەموو سازیێن مینا ھەسەدێ، پەیەدێ، تەڤ-دەم و سازیێن نەفەرمی وەکە دارایی و ئیستیخباراتێ. کادرۆیێن کو ژ ناڤ گەل وەکی ڤیترین ھاتبوون نیشاندان بوون دەستهلاتا راستەقین و تەنێ یا بریاردەر و جێبەجێکار.
ناڤێن پۆپوولەرێن وەکی مەزلووم عەبدی، ئیلهام ئەحمەد-رۆناھی عەفرین، فەوزا یوسوف-زاخۆ زاگرۆس، ئاسیا عەبدوللاھ-دیلان دێرک، سیپان حەمۆ-دەروەش عەفرن، حەسەن کۆچەر، ئالدار خەلیل، رۆژھلات عەفرن، ئامینا ئۆسێ-مزگین دێرک، نەورۆز ئەحمەد، حەسەن محەمەد عەلی-زوھات کۆبانی، شەرڤین دێرک-ھەدیا یوسوف، پەروین یوسوف، بەدران چیا کورد تەنێ بەشەک ژ ڤان کادرۆیانن.
ل بن ڤان دە ژی ھەتا ئاستێن رێخستنبوونا تاخان سیستەمەک ھات ئاڤاکرن کو ژ ئالیێ کادرۆیان ڤە دھات برێڤەبرن.
ل جھێن مینا ڤیلایێن لوکس، مێڤانخانە و ھتد.. یێن کو ژ سەردەما ئەسەد مابوون، ژ بۆ خوە ژیانەکە لوکس یا خوەسەر و ل دەرڤەیی گەل ئاڤا کرن.
لگەل پەیمانا 29ێ سباتێ، ئەڤ سیستەما کو پشتا خوە دسپارت دەستھلاتداریا کادرۆیان هلوەشیا. گەلێ کو بەرێ ب بڕینا ئەرزاقان، دەرخستنا ژ سازیان و ب ھێزا چەکێ دھات ترساندن، نھا کادرۆیان رەخنە دکە و وان ناخوازە. شەرڤانێن جوانێن د ناڤ ھەسەدێ دە ڤەدقەتن و ڤەدگەرن مالێن خوە. مرۆڤێن کو د سازیان دە دخەبتن ب ھنجەتێن جودا قوت دبن و دچن. مینا بەرێ حەرکینا دراڤی تونەیە. ژیانا لوکس، دراڤ، شۆفێر، ترومبێل، گەرێن گەشتێن دەرڤەی وەلاتی و بودجەیێن تایبەت ھەر کو دچە رادبن.
ل رۆژئاڤا ھەر تشت ھات رادەستکرن لێ کادرۆ ناخوازن دەستھلاتداریا خوە رادەست بکن.
کادرۆ مال، خانی، ئەرد و وەساییتێن کو د ناڤ 15 سالێن بۆری دە ھاتبوون ب دەست خستن، ل سەر ناڤێ خوە قەید دکن. ل سەر مژارا کو دێ تاپوو ل سەر ناڤێ کێ بن، شەرەکی مەزن ھەیە.
ھەروھا پشتی کو سیپان حەمۆ ل سووریەیێ وەکی ئالیکارێ وەزیری وەزیفە وەرگرت، نەخاسم د ناڤبەرا کادرۆیێن مێر یێن کەڤن دە شەرێ “کی دێ وەزیفەیا فەرمی وەربگرە” ھەیە.
و ل ئالیێ دن ژی کادرۆ دزانن کو ھەکە دەستھلاتا خوەیا ل سەر گەل ب تەمامی وندا بکن، وێ دەمێ ب ئاوایەکی کەسانە ژی نکارن خوە بپارێزن. ژ بۆ ڤێ یەکێ ژی دخوازن ئاڤاکرنا دەستھلاتێ ل سەر گەل نوو بکن.
ژ بۆ ڤێ یەکێ، ژ ئالیەکی ڤە گەل ھین ژی تەھدید دکن. ژ ئالیێ دن ڤە ژی ژ بۆ بەرھەڤکرنا گرسەیێ، د ھەڤدیتنێن لگەل شامێ سۆزێن وەکی “ئەم دێ بخەبتن دا کو ھوون ببن کارمەندێن فەرمی” و ھتد.. ددن.
ژ بۆ زندیھشتنا گرسەیێ، ھین ژی ب بەرۆڤاژیکرنا رۆژەڤێ رە مژوول دبن. چەک د دەستێ وان دە ھەبوو نەکرن، لێ نھا ژ گەل رە دبێژن “ژ بۆ مافێن کوردان یێن وەکی زمانێ کوردی، کۆتا، یەپەژێ و ھتد.. تێکۆشینێ بکن”.
ژ ئالیەکی ڤە ناکەڤن ھلبژارتنان و ژ بەر کو کەتیە ھلبژارتنان ئەنکسێ وەکی دژمن رادگەهینن؛ ژ ئالیێ دن ڤە ژی ژ بۆ کو ببن کارمەندێن دەولەتێ چالاکیان دکن.
شاشیێن کو 15 سالن ل رۆژئاڤا ھاتنە کرن، کورد مەحکوومی پەیمانا 29ێ سباتێ کرن. بەرپرسێ ڤێ یەکێ ژی پەکەکە و کادرۆیێن پەکەکێ یێن ل رۆژئاڤا نە. ژ بەر ڤێ بنکەفتنا کو قەومیە، یەک کادرۆیێ پەکەکێ ژی دەست ژ وەزیفەیا خوە نەکێشا و یەک کادرۆیێ پەکەکێ ژی خوە رەخنە نەکر. و ھین ژی مینا کو سەرکەفتنەک قەزەنج کربن، ھەول ددن رۆژەڤێ بەرۆڤاژی بکن.
دەستھلاتداریا کادرۆیان یا ل رۆژئاڤا چاوا کو د پێڤاژۆیا 15 سالێن بۆری دە دا ونداکرن، ژ نھا و پێ دە ژی ھەتا کو ب ڤی رەنگی بەردەوام بکە، دێ بدە ونداکرن.
