ترکیە: مافێ مەیە ئەم بەرسڤا هەر ئێریشەکە دژمنانە بدن
بەردەڤکێ وەزارەتا بەرەڤانیێ یا ترکیەیێ راگهاند، وەلاتێ وی مافێ خوەیێ پاراستنێ دپارێزە و داخواز دکە کو داوی ل شەرێ هەرێمی وەرە ئانین.
بەردەڤکێ وەزارەتا بەرەڤانیێ یا ترکیەیێ زەکی ئاکتورک، د جڤینەکە رۆژنامەڤانی دە پشتراست کر، دوهـ چارشەمێ مووشەکەکە بالیستیک يا ژ ئیرانێ ڤە هاتبوو ئاڤێتن، ژ ئالیێ سیستەمێن ناتۆیێ ڤە ل ئاسمانێ دەریایا ناڤین هاتیە تێکبرن. هەروها تەکەز کر، “ترکیە مافێ خوەیێ بەرسڤدایینێ ل هەمبەری هەر جورە هەلوەستەکە دژمنانە دپارێزە.”
زەکی ئاکتورک نووچەیێن ل سەر تۆرێن جڤاکی کو بەحسا دەستپێکرنا پێلەکە کۆچبەریا ب کۆم ژ ئیرانێ بەر ب ترکیەیێ ڤە دکرن، ب تەمامی رەد کرن. ئاکتورک گۆت: “ت لڤ و تەڤگەرا نەئاسایی ل سەر سینۆرێن مە نینە. هێزێن مە رێکارێن توندێن ئەولەهیێ گرتنە و رەوش د بن کۆنترۆلێ دەیە.”
دەربارێ هەلوەستا ترکیەیێ یا ل هەمبەری شەرێ د ناڤبەرا ئیران، ئامەریکا و ئیسرائیلێ دە، ئاکتورک راگهاند، ترکیە داخواز دکە ئەڤ پەڤچوون یەکسەر وەرن راوەستاندن. هەروها نیگەرانیا خوە ئانی زمان کو ئیرانێ د ئێریشێن خوە دە وەلاتێن سێیەمین (وەلاتێن هەرێمێ کونە ئالیێن شەرن) زێدەتر کرنە ئارمانج.
د بەشەکە دن يا داخویانیێ دە، بەردەڤکێ وەزارەتا بەرەڤانیێ یا ترکیەیێ چالاکیا پژاکێ یا ل ناڤ ئاخا ئیرانێ شەرمەزار کر و دیار کر کو ئەڤ جورە رێخستن زیانێ دگهینن ئارامیا تەڤاهیا ناڤچەیێ.
