بەردەڤکا کۆچکا سپی کارۆلین لیڤیت ژ ئالیێ خوە ڤە د داخویانیەکێ دە ژ وێ کانالا ئامەریکایی رە پلانا ئێریشا بەژایی رەد کر، لێ دانپێدان کر کو ھەمی بژاردە ژ بۆ سەرۆک ترامپ ڤەکرینە و هێژ چ بریارەک ل سەر ئێریشەکا بەژایی نەدایە.
ل گۆری ئامارێن پەنتاگۆنێ، د دەما ھەشت رۆژێن بۆری دە د ئەنجاما ئێریشێن ئامەریکا و ئیسرایلێ یێن ل سەر ئیرانێ دە ھەتا نھا شەش سەربازێن ئامەریکایی ھاتنە کوشتن و 18 سەربازێن دن ژی بریندار بوونە.
ئەڤ ژی د دەمەکێ دەیە کو، ئیسرایل و ئامەریکایێ ل سەرێ سبەھا رۆژا شەمیێ، 28ێ سباتا 2026ێ، ب ھەڤ رە ئێریشی ئیرانێ کر و گەلەک باژارێن وی وەلاتی بۆمبەباران کرن، و د ئەنجامێ دە رێبەرێ بلندێ کۆمارا ئیسلامی یا ئیرانێ عەلی خامنەیی و گەلەک سەرکردەیێن بلندێن ئیرانێ ھاتن کوشتن.
د بەرسڤا وێ ئێریشێ دە، ئیرانێ ژی ئێریشی وەلاتێ ئیسرایلێ و جھ و بنگەھێن ئامەریکایێ ل چەند وەلاتێن دەڤەرێ کر و ھەتا نھا ژی ئێریشێن ھەر دو ئالیان بەردەوامن و ھەژمارا کوشتی و برینداران و زرارێن مادی بەر ب زێدەبوونێ ڤەیە.
ھەرێما کوردستانێ ژی، و ب تایبەتی ژی باژارێ ھەولێرێ، د ڤێ چارچۆڤەیێ دە چەند جاران کەفتیە بەر ئێریشێن ب مووشەک و درۆنان، لێ ھەمی ئێریشێن ئاسمانی یێن ئیرانێ ژ ئالیێ سیستەما بەرەڤانیا ئاسمانی ڤە ل ھەرێما کوردستانێ ھاتنە شکاندن.
