هەڤسەرۆکا دەم پارتیێ: چارەسەری نە د شەر دە، د ئیرانا دەمۆکراتیک دەیە
ھەڤسەرۆکا گشتی یا دەم پارتیێ هاتیمۆغلاری، کو بەرێ رەژیما ئەسەد دپاراست، ڤێ جارێ خوە کرە مەرتال ژ بۆ رەژیما ئیرانێ و ل دژی ئۆپەراسیۆنێن ئیسرایلێ دەرکەت.
توولای هاتیمۆغلاری د جڤینا کۆما ژنان یا پارتیا خوە دە ئاخڤی و گۆت: “قەدەرا ئیرانێ گەلێن ئیرانێ دیار دکن. کورد، ئازەری، بەلووچ و فارس دیار دکن. دڤێت ئامەریکا و ئیسرایل دەملدەست داویێ ل ئێریشێن خوە بینن. چارەسەری د کۆمارا ئیرانێ یا دەمۆکراتیک دەیە.”
هاتیمۆغلاری بال کشاند سەر ئێریشێن ئامەریکا و ئیسرایلێ یێن ل سەر ئیرانێ و ئەو ئێریش شەرمەزار کرن. هاتیمۆغلاری گۆت: “ئەم وەک ژن ڤێ ئێریشێ ب توندی شەرمەزار دکن.”
هاتیمۆغلاری د ئاخافتنا خوە دە دەربارێ ئۆپەراسیۆنان دە ئەڤ تشت ئانین زمان:
“دەما کو ئامەریکا و ئیسرایل ل سەر مێزێ دانووستاندنێن خوە لگەل ئیرانێ ددۆماندن، ئێریش برن سەر ئیرانێ. ئیحتمالەکە مەزن ھەیە کو ئەڤ شەر تەڤاھیا ھەرێمێ ڤەگرە؛ ژخوە نھا باندۆر ل ئیراق، لبنان و وەلاتێن کەنداڤێ کریە و ھەرێم بەر ب ئاژاوەیەکە بخوین ڤە دچە. د ڤان ئێریشان دە ل ئیرانێ دبستانەکا کەچان ھات بۆمبەبارانکرن. وە ھەموویان دیت، د وێ دبستانێ دە نێزی 170 کەچان، بەلکی بێتر، ھاتن قەتلکرن. ب سەدان بریندار ھەنە. دیسا مرنا ژنان، دیسا مرنا زارۆکان و دیسا ئەنجامێن شەری یێن کو مێران دانە دەستپێکرن. ئەم وەک ژن ڤێ ئێریشێ ب توندی شەرمەزار دکن. ل ڤان ئاخان گەلەک خوین حەرکی، ئێدی بەسە.”
هاتیمۆغلاری: “چارەسەری نە د شەر دە، د ئیرانا دەمۆکراتیک دەیە”
هاتیمۆغلاری دەستنیشان کر کو ئۆپەراسیۆنا ل سەر ئیرانێ نایێ رەواکرن و گۆت: “چارەسەری نە د شەر دەیە، نە د رەژیما ئۆتۆریتەر دەیە؛ چارەسەری د ئاڤاکرنا کۆمارا ئیرانێ یا دەمۆکراتیک دەیە.”
هاتیمۆغلاری د ئاخافتنا خوە دە بال کشاند سەر رەوشا ئۆجالان و داخویانیا وی یا 27ێ سباتێ و گۆت: “ئەنتەگراسیۆنا دەمۆکراتیک ھەری کێم ب قاسی ئاڤاکرنا کۆمارێ گرنگە.”
هاتیمۆغلاری بەحسا داخوازێن گەلێ کورد کر و ئیدیعا کر کو ئەڤ داخوازی نە تەنێ ژ بۆ کوردان، ژ بۆ تەڤاھیا ترکیەیێ تێ واتەیا دەمۆکراتیکبوونێ. لێ بەلێ، دەربارێ داخوازا ناسنامەیێ یا کوردان دە تشتەک نەگۆت؛ تەنێ خوەست کو پێگەهەکە فەرمی ژ بۆ ئۆجالان بێ دیارکرن.
ئەڤ بانگاوازیا “دەمۆکراتیککرنا ئیرانێ” و رەوانەدیتنا ئێریشێن ل سەر ئیرانێ (رەژیما کو زلمێ ل گەلێ کورد دکە و رێبەرێن وان ل سەر مێزێ دانوستاندنێ قەتل کرنە)، بوو سەدەما بەرتەکێن مەزن. کوردێن رۆژھلاتێ کوردستانێ یێن کو مەدیایا ترکی دشۆپینن، پشتی بانگا دەم پارتیێ و هاتیمۆغلاری ، ھاشتاگا “ستۆپ دەم پارت” پارڤەکرن کرن.
