سەرۆکێ پارلامەنتۆیا ئیسرایلێ گەفان ل رێبەرێ ئیرانێ یێ نوو دکە

سەرۆکێ کنێسێتا ئیسرایلێ د پەیامەکێ دە گەف ل رێبەرێ ئیرانێ یێ نوو کرن و گۆت: ھەر کەسەکێ رێیا خامنەیی بگرە، دێ چارەنڤیسا وی ھەبە.

سەرۆکێ پارلامانتۆیا ئیسرایلێ ئامر ئۆھانا ل سەر پلاتفۆرما Xێ گەف ل رێبەرێ ئیرانێ یێ نوو موجتەبا خامنەیی کرن. وی د پۆستێ خوە دە وێنەیێن چەند سەرکردەیان دانانە کو ھاتنە کوشتن و وێنەیێ رێبەرێ بلندێ ئیرانێ یێ پێشتر عەلی خامنەیی ژی د ناڤ وان دەیە.

ئۆھانا ب زمانێ عبری نڤیسیە: ھەر کەسەکێ ل سەر رێیا وان بچە، دێ وەکی وان لێ بێ. ئەڤ ژی ئاماژەیەکە ژ بۆ وێ یەکێ کو، دێ بێ کوشتن.

ئەنجوومەنا شارەزایان یا ئیرانێ موجتەبا خامنەیی وەکی رێبەرێ نوویێ شۆرشا ئیسلامی ھلبژارت و د راگھاندنەکێ دە ئاماژە دا وێ یەکێ کو، ل گۆری مادەیا 111ێ یا دەستوورێ، ئەنجوومەنەکا دەمکی ژ بۆ ھلبژارتنا رێبەرێ نوو و پرکرنا ڤالاھیا بلندترین پۆستێ وی وەلاتی ھات پێکانین.

ھەروەسا ئاماژە دا کو، ئەنجوومەنا دەمکی یا شارەزایان ئیرۆ رۆژا دوشەمب، 9ێ ئادارا 2026ێ، ل گۆری مادەیا 108 یا دەستوورێ ئایەتولاھ سەیید موجتەبا حوسەینی خامنەیی وەکی رێبەرێ بلندێ ئیسلامی یێ ئیرانێ یێ سێیێ ھلبژارت و داخواز ژ ھەمی گەلێ ئیرانێ کر کو بەیعەتێ بدن رێبەرێ نوو.