نیو یۆرک تایمز: ئێریشا ل سەر گراڤا خارگێ پرانیا ھناردەکرنا پەترۆلێ راوەستاندیە

مەدیایەکە ئیرانێ ئیرۆ رۆژا شەمبی، 14ێ ئادارا 2026ێ، راگھاند کو ئێریشێن ئاسمانی یێن ئامەریکایێ ل سەر گراڤا خارگێ چ زرارەک نەدایە ژێرخانەیا پەترۆلێ یا وێ گراڤێ.

ئاژانسا فارسێ یا نووچەیان ژ چەند چاڤکانیان راگھاند کو، ئامەریکایێ ل سەرێ سبەھا ئیرۆ ئێریشی گراڤا خارگێ کر و دەنگێ زێدەتر ژ 15 تەقینان ھات بھیستن.

چاڤکانیان ئەشکەرە کریە کو، د ڤان ئێریشان دە زرار نەگھیشتیە چ ژێرخانەیەکا پەترۆلێ.

نیو یۆرک تایمزێ ژی ژ رایەدارەکی ئیرانێ بەلاڤ کر کو، ئێریشا ل سەر گراڤا خارگێ بەشەکا مەزن ژ ھناردەکرنا پەترۆلێ راوەستاندیە. ئەشکەرە ژی کریە کو، “ئێریشا ل سەر وێ گراڤێ مەزن و وێرانکەر بوو، ب رەنگەکی کو مینا ئەردھەژەکێ بوو”.

سەرۆکێ ئامەریکایێ دۆنالد ترامپ ل سەرێ سبەھا ئیرۆ د پۆستەکێ دە ل سەر پلاتفۆرما ‘ترو سۆسیال’ێ نڤیساند: بەری چەند کێلیان، ب فەرمانا من، فەرمانداریا ناڤەندییا ئامەریکایێ یەک ژ ئێریشێن ئاسمانییێن ھەری بھێز د دیرۆکا رۆژھلاتا ناڤین دەست پێ کر، و ھەمی ئارمانجێن لەشکەری یێن ل سەر ‘گەوھەرا تاجێ یا ئیرانێ، گراڤا خارگێ، ب تەڤاھی وێران کرن.

سەرۆکێ ئامەریکایێ ھەروەسا تەکەز ژی کر: ھەتا نھا چەکێن مە بھێزترین و پێشکەتیترین چەکێن جیھانێ نە.

ترامپ ئەشکەرە ژی کر: من دەستوور نەدایە کو ژێرخانەیا پەترۆلێ یا وێ گراڤێ بهێت وێرانکرن، لێ ھەکە ئیران یان ھەر ئالیەکی دن ھەر کارەکی بکە کو رێیێ ل بەر کەشتییان بگرە کو ب ئازادی و ئەولەھی د تەنگاڤا ھورمزێ رە دەرباز ببن، ئەز دێ دەملدەست وێ بریارێ بنرخینم.

ئەڤ ژی د دەمەکێ دەیە کو، ئیسرایل و ئامەریکایێ ل سەرێ سبەھا رۆژا شەمبیێ، 28ێ سباتا 2026ێ، ب ھەڤ رە ئێریشی ئیرانێ کر و گەلەک باژارێن وی وەلاتی بۆمبەباران کرن، و د ئەنجامێ دە رێبەرێ بلندێ کۆمارا ئیسلامی یا ئیرانێ عەلی خامنەیی و گەلەک سەرکردەیێن بلندێن ئیرانێ ھاتن کوشتن.

د بەرسڤا وێ ئێریشێ دە، ئیرانێ ژی ئێریشی وەلاتێ ئیسرایلێ و جھ و بنگەھێن ئامەریکایێ ل چەند وەلاتێن دەڤەرێ کر و ھەتا نھا ژی ئێریشێن ھەر دو ئالیان بەردەوامن و ھەژمارا کوشتی و برینداران و زرارێن مادی بەر ب زێدەبوونێ ڤەیە.

ھەرێما کوردستانێ ژی، و ب تایبەتی ژی باژارێ ھەولێرێ، د ڤێ چارچۆڤەیێ دە چەند جاران کەفتیە بەر ئێریشێن ب مووشەک و درۆنان، لێ پرانیا ئێریشێن ئاسمانی یێن ئیرانێ ژ ئالیێ سیستەما بەرەڤانیا ئاسمانی ڤە ل ھەرێما کوردستانێ ھاتنە شکاندن.