سەرۆکێ پارلەمەنتۆیا ترکیێ بەحسا “پێڤاژۆ”یێ کر..

سەرۆکێ پارلەمەنتۆیا ترکیێ نومان کورتولموش، د داخویانیەکێ دە دەربارێ پێڤاژۆیێ دە گۆت، “ئەڤ نە وەکی ھەولدانێن 2009، 2013ێ یان ژی یێن بەرێیە. گەر ئەڤ ب سەر نەکەڤە، گەر دیوار ھلوەشە، سیاسەتا سڤیل دێ د بن ڤی دیواری دە وەرە پەلچقاندن. خوەدێ نەکە، گەر ئەم ب سەر نەکەڤن، رەوش دکارە ژ 4ێ تەباخا 2025ێ هێژ خرابتر ببە.”

کورتولموش د خوارنا پاشیڤێ دە بەرسڤا پرسێن رۆژنامەڤانان دا.

کورتولموش راگھاند کو پشتی تەمامکرنا راپۆرا کۆمیسیۆنا ھەڤگرتنا نەتەوەیی، براتی و دەمۆکراسیێ، نیقاشێن ل سەر رێزکنامەیێن قانوونی دێ پشتی بێهنڤەدانێ ل مەجلسێ دەست پێ بکن. کورتولموش د بەرسڤا پرسەکێ ل سەر راپۆرێ دە وھا گۆت: “ئالیێ ھەری گرینگێ راپۆرا کۆمیسیۆنا ھەڤگرتنا نەتەوەیی، براتی و دەمۆکراسیێ ئەو بوو کو ھەموو پارتی ل سەر ناڤەرۆکەکا ھەڤپار لھەڤکرنەک چێکرن. بێ گومان، ئەڤ راپۆر نە ھەر تشتە، لێ ئەو وەکی نەخشەرێیەکە. ب تایبەتی، بەشێن 6 و 7 یێن راپۆرێ پێشنیارێن بەربچاڤ ل سەر تشتێن کو دکارن وەرن کرن پێشکێش دکن. گاڤا دن ئەوە کو ب لەز دەرباسی قۆناغا یاسایی ببن. رایا من ئەوە کو دڤێت ب رێکەفتنا ھەموو ئالیان ل سەر ناڤەرۆکەک ھەڤپار لھەڤکرنەک چێببە. ژ بۆ ڤێ یەکێ، ئەڤ مژار دڤێت بێیی کو دەرەنگ بمینە وەرە چارەسەر کرن. ئەز دفکرم کو ئەوێ پشتی بێهنڤەدانێ دەرکەڤە ھۆلێ. د بەشا 6ێ دە، مژارا ‘ئاستا کریتیک’ ھەیە، کو ب لھەڤکرنێ ھاتە نیقاش کرن. ژ بۆ کو رێزکنامەیێن قانوونی ل سەر ڤێ مژارێ وەرن چێکرن، وەکی مەرجەکی ھاتە دانین کو رێخستن چەکێن خوە دەینە و خوە هلوەشینە، وەکی کو ژ ھێلا ھێزێن ئەولەھیێ یێن دەولەتێ ڤە ھاتیە دەستنیشانکرن. ئەڤ ھەولدان دکارن د ھەمان دەمێ دە وەرن کرن، لێ د داویێ دە، دەستنیشانکرنا کو رێخستن خوە هلوەشینە و چەکێن خوە دەینە نە تشتەکە کو پارلامەنتۆ بکە؛ بێ گومان، ئەو مژارەک ژ بۆ ھێزێن ئەولەھیێ یە.” یەکینەیێن پەیوەندیدار دێ کارێ خوە بکن. گەر بریارەک دەرکەڤە ھۆلێ کو نیشان بدە کو د ڤی واری دە ب کێمانی پێشڤەچوونەک گرینگ چێبوویە، بێ گومان رێزکنامەیێن قانوونی یێن پێویست دێ وەرن دانین.”

کورتولموش بەحسا نیقاشێن ھلبژارتنێن پێشوەخت یێن کو جارنان د دەردۆرێن سیاسی یێن ئەنقەرێ دە تێنە گۆتوبووژ کرنوو ڤان گۆتنان رەد دکە. کورتولموش گۆت: “ئەز نیەت و رایا خوە دیار دکم. ھەتا ھلبژارتنێ ھین ژی گەلەک دەم ھەیە. ھلبژارتنێن پێشوەخت چێنابن.”