ئیسرایلێ ھوورگلیێن ئێریشا ل سەر ناڤەندێن ئەتۆمی یێن ئیرانێ ئەشکەرە کرن
ئارتێشا ئیسرایلێ راگھاند، زێدەتری 50 فرۆکەیێن شەری د سێ قۆناغان دە ئێریشی بنەسازیا ئەتۆمی و لەشکەری یا ئیرانێ کرنە و دەربەیەکا گران ل شیانا مووشەکی و ئەتۆمی یا تەھرانێ خستنە.
ئارتێشا ئیسرایلێ ئیرۆ 28ێ ئادارێ ب داخویانیەکێ ل سەر حەسابا خوە یا تۆرا جڤاکی “X”، ھوورگلیێن ئێریشا ئاسمانی یا بەرفرەھا رۆژا 28ێ ئادارێ ئاشکەرە کرن. ل گۆری داخویانیێ، ئۆپەراسیۆن ل سەر بنگەھا زانیاریێن ئیستیخباراتی یێن ھوور ھاتیە کرن و بنەسازیێن لەشکەری یێن ئیرانێ ل سێ ناڤچەیێن جودا ھاتنە ئارمانجگرتن.
د داخویانیێ دە ھات دەستنیشانکرن، د ناڤ ئارمانجێن سەرەکی دە “کارگەھا ئاڤا گران” یا ل باژارێ ئەراکێ ھەبوو کو ژ بۆ بەرھەمێن پلووتۆنیوومێ یێ تایبەت ب چەکێن ئەتۆمی دھات بکارئانین. ھەروھا کارگەھەکا تایبەت یا بەرھەمێن تەقەمەنیێ یا ژ بۆ دەولەمەندکرنا یورانیومێ ل باژارێ یەزدێ ژی ب گرانی ھات بۆمبەبارانکرن.
بەردەڤکێ ئارتێشا ئیسرایلێ دیار کر، ئێریش ب سێ قۆناغان و د ناڤا چەند دەمژمێران دە پێک ھاتیە. د ڤێ ئۆپەراسیۆنێ دە گەلەک کارگەھێن پیشەسازیا لەشکەری و بنگەھەکێ وەزارەتا بەرگریێ یا ئیرانێ ھاتنە رووخاندن. ھات راگھاندن، ئەڤ ناڤەند ژ بۆ چێکرنا تەقەمەنیێن پێشکەفتی و دابینکرنا چەکان بۆ کۆمێن وەکی حەماس و حزبوللاھێ دھاتن بکارئانین. ھەروھا کارگەھێن چێکرنا پارچەیێن مووشەکێن بالیستیک و سیستەمێن دژە فرۆکە ژی د ناڤ ئارمانجان دە بوون.
ئارتێشا ئیسرایلێ تەکەز کر، تێکبرنا ڤان ئارمانجان، دەربەیەکێ ستراتەژیک و گرانە ل دژی شیانێن ئیرانێ یێن ژ بۆ چێکرنا مووشەکێن بالیستیک و چەکێن ئەتۆمی. ئیسرایلێ ھەر وھا راگھاند، ئەو دێ ل سەر لێدانا پیشەسازیا لەشکەری یا ئیرانێ بەردەوام بن، ھەتا کو ھەموو وان شیانێن کو تەھرانێ د ناڤا سالان دە ئاڤا کرنە ژ ناڤ ببن.
