دۆنالد ترامپ نامەیەکە تایبەت ژ بۆ نێچیرڤان بارزانی شاند: “نەورۆز پیرۆز”
سەرۆکێ ویلایەتێن یەکبوویی یێن ئامەریکایێ دۆنالد ترامپ، ب بۆنەیا جەژنا نەورۆزێ پەیامەکە پیرۆزباھیێ یا تایبەت ژ سەرۆکێ ھەرێما کوردستانێ نێچیرڤان بارزانی رە شاند. ترامپ د داویا نامەیا خوە دە ب زمانێ کوردی پەیڤا “نەورۆز پیرۆز” بکار ئانی.
سەرۆکاتیا ھەرێما کوردستانێ راگھاند کو سەرۆکێ ئامەریکایێ دۆنالد ترامپ، ب پەیامەکا فەرمی جەژنا نەورۆزێ ل سەرۆک نێچیرڤان بارزانی و گەلێ کوردستانێ پیرۆز کریە. ترامپ د نامەیا خوە دە پیرۆزباھیێن ھەری گەرم پێشکێشی گەلێ ھەرێمێ کرن و بال کشاند سەر گرنگیا ڤێ جەژنا نەتەوەیی و دیرۆکی.
“سەرکەفتنا رۆناھیێ ل سەر تاریێ”
دۆنالد ترامپ د نامەیا خوە دە واتەیا سەمبۆلیکا نەورۆزێ وەکی “دەستپێکەکە نوو” پێناسە کر و وھا گۆت:
“نەورۆز، پیرۆزکرنا ھاتنا بھارێیە. ھەر وھا بەرجەستەکرنا سەرکەفتنا ھەردەمی یا رۆناھیێ ل سەر تاریێ یە. ئەڤ جەژنا کەڤنار، ھەر سال ئیفادەیا ھێزا دەستپێکێن نوویە.”
سەرۆکێ ئامەریکایێ د بەردەوامیا پەیاما خوە دە ھێڤیێن خوەیێن ژ بۆ ئاشتیا جیھانی و روومەتا مرۆڤاھیێ ئانین زمان. ترامپ دیار کر کو ئەو ھێڤی دکە ئەڤ سالا نوو ببە سەدەما خێر و خوەشیێ ژ بۆ تەڤاھی ھەرێمێ.
پەیاما ب زمانێ کوردی: “نەورۆز پیرۆز”
یەک ژ خالێن ھەری بالکێشێن نامەیا سەرۆکێ ئامەریکایێ دۆنالد ترامپ ئەو بوو کو د داویا پەیاما خوە دە جھ دا زمانێ کوردی. ترامپ ب نڤیساندنا “نەورۆز پیرۆز”، رێز و گرینگیا کو ئامەریکا ددە چاند و ناسنامەیا گەلێ کوردستانێ نیشان دا.
ل گۆری داخویانیا سەرۆکاتیا ھەرێما کوردستانێ، ئەڤ پەیام نیشانەیا بەردەوامیا پەیوەندیێن دیپلۆماتیک و دۆستانە یا د ناڤبەرا ھەولێر و واشنگتۆنێ دەیە. ھات راگھاندن کو ترامپ ئەڤ جەژن ل ھەموو کەسێن کو ل سەرانسەرێ جیھانێ نەورۆزێ پیرۆز دکن، پیرۆز کریە.
