ترامپ: ئەفسەرێ ب پلەیا عەقید ژ ناڤ ئاخا ئیرانێ ھات رزگارکرن
سەرۆکێ ویلایەتێن یەکبوویی یێن ئامەریکایێ، دۆنالد ترامپ، ب داخویانیەکێ راگھاند کو ھێزێن تایبەتێن ئامەریکایێ د ئۆپەراسیۆنەکە “دیرۆکی و وێرەک” دە، ئەفسەرێکی پلەبلند (عەقید) ژ کووراھیا ئاخا ئیرانێ رزگار کریە.
ل گۆری پەیاما کو ترامپ ل سەر پلاتفۆرما تروس سۆسیال بەلاڤ کریە، ئەڤ ئەفسەرێ ئامەریکایی ل ھەرێمێن چیایی و ئاسێ یێن ئیرانێ، ل پشت خەتێن دژمن ئاسێ مابوو. ترامپ دیار کر کو ئەفسەر د بن شۆپاندنا ھێزێن نەیار دە بوو، لێ ب ھەڤاھەنگیا فەرمانداریا گشتی و ب پشتگریا ب دەھان بالافرێن شەرێن پێشکەفتی، د ئۆپەراسیۆنەکا ھوور و کێموێنە دە ھات رزگارکرن.
ترومپ دەربارێ رەوشا ئەفسەر دە گۆت، “ئەز گەلەک کێفخوەشم کو راگھینم ئەفسەرێ مە نھا بسەلامەتە. ھەر چەند ھنەک برینێن وی ھەبن ژی، لێ رەوشا وی یا تەندورستیێ باشە.”
ترامپ ئەشکەرە کر کو ئەڤ سەرکەفتنا دویەمینە د ناڤا 48 دەمژمێران دە. وی دا زانین کو دوھی ژی بالافرڤانەکی دنێ ئامەریکایی ھاتبوو رزگارکرن، لێ ژ بۆ پاراستنا ئەولەھیا ئۆپەراسیۆنا دویەمین، نووچەیا یەکەم ھاتبوو ڤەشارتن.
سەرۆکێ ئامەریکایێ بال کشاند سەر شیانا لەشکەری یا وەلاتێ خوە و دەستنیشان کر کو ئەڤ ئۆپەراسیۆن بێیی کو چ زیانەک بگھیژە سەربازێن ئامەریکایی ب داوی بوونە. ترامپ ئەڤ یەک وەکی نیشانەیا “سەروەریا تەماما ئاسمانی یا ئامەریکایێ ل سەر ئەسمانێ ئیرانێ” پێناسە کر.
د داویا پەیاما خوە دە، ترامپ بانگ ل ھەموو وەلاتیێن ئامەریکایێ، ژ ھەر دو پارتیێن دەمۆکرات و کۆماری کر، کو ب ھێزێن خوەیێن چەکدار شاناز بن و راگهاند، “مە ئارتێشا ھەری پیشەکارا جیھانێ ھەیە.”
ترامپ هەر وەها د پەیاما خوە دە جەژنا قیامەیێ ل گەلێ خوە پیرۆز کر.
