واشنگتۆن و تەھران ل سەر ئاگربەستەکە 45 رۆژی گۆتووبێژان دکن
مالپەرا نووچەیان یا ناڤدارا ئامەریکی، ئەکسیۆس، ئەشکەرە کر کو ویلایەتێن یەکبوویی یێن ئامەریکایێ و کۆمارا ئیسلامی یا ئیرانێ، ب ناڤبەینکاریا چەند وەلاتان، ل سەر پێشنیارا ئاگربەستەکا 45 رۆژی د ناڤ دانووستاندنان دە نە.
ل گۆری راپۆرا کو ئیرۆ، 6ێ نیسانا 2026ێ، ھاتیە وەشاندن، ئەڤ لڤ و تەڤگەرا دیپلۆماتیک وەکی “دەرفەتا داوی” تێ پێناسەکرن. ئارمانج ژێ ئەوە کو رێ ل بەر کارەساتەکا مرۆڤی و شەرەکی بەرفرەھێ ھەرێمی بهێت گرتن کو نھا رۆژھلاتا ناڤین ب گرانی د بن گەفا وێ دەیە.
تەڤی کو ھەولدانێن دیپلۆماتیک گھیشتنە ئاستەکە بلند، چاڤکانیێن ئاگاھدار ژ ئەکسیۆس رە راگھاندنە کو د ناڤا 48 دەمژمێرێن بهێت دە شانسێ گھیشتنا رێکەفتنەکە داوی “گەلەکی کێمە.” ژ بەر کو ھین ژی ل سەر گەلەک خالێن ستراتەژیک و تەکنیکی د ناڤبەرا واشنگتۆن و تەھرانێ دە ناکۆکیێن کوور ھەنە کو نەھاتنە چارەسەرکرن.
ئەڤ ھەولدان د دەمەکێ دە نە کو گرژیێن لەشکەری ل رۆژھلاتا ناڤین گھیشتینە ئاستا ھەری بلند. وەلاتێن ناڤبەینکار ھەول ددن ب رێیا ڤێ ئاگربەستا 45 رۆژی، ھنەکی ژ گرژیا ل ناڤچەیێ کێم بکن و رێ ل بەر رووبرووبوونەکا راستەراستا لەشکەری بگرن کو دکارە کارەساتەکا مەزن ب خوە رە بینە.
ئەڤ هەولدان د دەمەکی دەیە کو ھەتا نھا ب فەرمی ژ ئالیێ وەزارەتا دەرڤەیا ھەر دو وەلاتان ڤە داخویانیەکا پشتراستکرنێ نەھاتیە دایین، لێ چاڤێن جیھانێ ل ئەنجامێن ڤان گۆتووبێژێن نەپەنی نە.
