دانوستاندنێن ل ئیسلامابادێ بێەنجام ب داوی ھاتن

جیگرێ سەرۆکێ ئامەریکایێ جەی دی ڤانس، ڤێ سبەھێ یەکشەمێ (12ێ نیسانا 2026ێ)، ب فەرمی راگھاند کو دانوستاندنێن دیپلۆماتیکێن ب کۆمارا ئیسلامییا ئیرانێ رە بێیی گھیشتنا ب چ رێکەفتنەکێ ب داوی بوونە. ل پەی ڤێ داخویانیێ، شاندا ئامەریکایی ل پایتەختا پاکستانێ، ئیسلاماباد، بەر ب واشنگتۆنێ ڤە ب رێ کەت.

ڤانس د کۆنفەرانسەکە رۆژنامەڤانی دە کو ل پایتەختا پاکستانێ ھات لدارخستن، ئەشکەرە کر کو تیمێن تەکنیکی و دیپلۆماتیکێن ھەر دو وەلاتان نێزیکی 21 دەمژمێران ب ئاوایەکی رووبروو دانوستاندن کرنە. لێ بەلێ، تەڤی ڤان ھەولدانێن درێژ، ئالی نەگھیشتنە ئەنجامەکێ کو داخوازێن ھەر دو ئالیان دابین بکە و بەرژەوەندیێن وان بپارێزە.

جیگرێ سەرۆکێ ئامەریکایێ دەستنیشان کر کو واشنگتۆنێ “باشترین پێشنیارێن موومکن” پێشکێشی تەھرانێ کرنە، لێ وی ئامادەھیا خوە نیشان نەدا کو ھوورگلیێن ڤان پێشنیاران ژ بۆ رایا گشتی ئەشکەرە بکە. ڤانس بال کشاند سەر وێ یەکێ کو ناکۆکیا بنگەھین ل سەر بەرنامەیا ئاتۆمییە و گۆت، ھەر چەند دەزگەھێن ئەتۆمی یێن ئیرانێ ھاتنە تێکدان ژی، لێ ئالیێ ئیرانی نە ئامادە بوو سۆزا راوەستاندنا بەرنامەیا خوە بدە و مە چ پابەندیەکە پشتراست ژ بۆ نەھشتنا چەکێن ئەتۆمی ژ وان نەبھیست.”

ژ ئالیێ دن ڤە، مەدیایا فەرمی یا ئیرانێ بەرپرسیاریا تێکچوونا دانوستاندنان خست ستوویێ ئامەریکایێ. چاڤکانیێن نێزیکی تیما دانوستاندنان یا ئیرانێ، واشنگتۆن ب “چاڤبرچیتی” و “داخوازێن زێدە” تاوانبار دکن. وان دیار کر کو ئامەریکا ل ھنجەتان گەریایە دا کو مێزا دانوستاندنان بتەرکینە و ئامادە نەبوویە کو ژ داخوازێن خوەیێن توند ڤەگەرە.

د چارچۆڤەیا ڤێ ئالۆزیێ دە، چاڤکانیێن پاکستانی یێن کو چاڤدێریا ڤان جڤینان دکرن، راگھاندن کو ئاتمۆسفەرا ناڤبەرا ھەر دو شاندان گەلەکی ئالۆز بوویە. ھات زانین کو پێڤاژۆیا دانوستاندنان د ناڤبەرا “توندبوون و ئارامیێ” دە دەرباس بوویە، ھەتا کو د داویێ دە ئالیێ ئامەریکایی بریار دا کو بێیی چ ئەنجامەکێ داوی ل ھەڤدیتنان بینە. ھەیا نھا، چ پلانەکە فەرمی ژ بۆ گەرا نوویا دانوستاندنان نەھاتیە دەستنیشانکرن.