ترامپ گەفا دۆرپێچا دەریایی ل دژی ئیرانێ دخوە

سەرۆکێ ویلایەتیێن یەکبوویی یێن ئامەریکایێ دۆنالد ترامپ، راگھاند کو ئەگەر تەھران داخوازێن واشنگتۆنێ قەبوول نەکە، ئەو دێ “دۆرپێچەکا دەریایی یا بەرفرەھ” بخە دەورێ. ترامپ ئەڤ پێنگاڤد وەکی “کارتا سەرکەفتنێ”یا ل دژی ئیرانێ ب ناڤ کر.

ترامپ ب رێیا حەسابا خوە یا تروس سۆسیال ڤیدیۆیەک پارڤە کر و بال کشاند سەر باندۆرا دۆرپێچا دەریایی. د ڤیدیۆیێ دە تێ دەستنیشانکرن کو ئەگەر رێیێن دیپلۆماتیک ئەنجام نەدن، ئەڤ دۆرپێچ دێ ببە ئاموورەکە یەکالیکەر ژ بۆ تێکبرنا ئابۆریا ئیرانێ.

ل گۆری شرۆڤەیێن د نووچەیێ دە، ئەگەر ئیران ل سەر ھەلوەستا خوەیا نھا بەردەوام بە، دبە کو ترامپ ژ بلی دۆرپێچێ، بژاردەیا ئۆپەراسیۆنێن لەشکەری و بۆمبەبارانکرنا ناڤەندێن ستراتەژیک ژی بخە رۆژەڤێ. ئارمانجا سەرەکەیا دۆرپێچێ، بڕینا ھناردەیا پەترۆلا ئیرانێ یا بەر ب چین و ھندستانێ ڤەیە، کو ئەڤ یەک دێ زەختەکە گران یا دیپلۆماتیک ل سەر ڤان وەلاتان ژی ئاڤا بکە.

ئەڤ داخویانیێن توند پشتی بێەنجامبوونا گەرا داوی یا دانوستاندنێن ل ئیسلامابادا پاکستانێ ھاتن. جیگرێ سەرۆکێ ئامەریکایێ جەی دی ڤانس ل سەر مژارێ گۆت، “واشنگتۆن ژ خەتێن خوەیێن سۆر پاشڤە ناکشە. نھا تۆپ د قادا ئیرانێ دەیە و دڤێت تەھران بریارا خوە بدە.”

تێ گۆتن کو ترامپ دخوازە ھەمان ستراتەژیا کو ل دژی سەرۆکێ ڤەنەزوەلایێ نیکۆلاس مادورۆ ب کار ئانیبوو، ل دژی ئیرانێ ژی بمەشینە. د وێ سەردەمێ دە، دۆرپێچا دەریایی ئابۆری یا ڤەنەزوەلایێ ئیفلیج کربوو.

د وارێ لەشکەری دە ژی تەڤگەرێن گرینگ ھەنە:

کەشتیا بالافرھلگرا مەزن ئوسس گەرالد فۆرد گھیشت ئاڤێن کەنداڤێ.

ئەڤ کەشتی تەڤلی کەشتیا ئوسس ئابراھام لینکۆلن و ھێزێن دن یێن دەریایی بوو.

پسپۆر د وێ باوەریێ دە نە کو ئارمانج کۆنترۆلکرنا تەنگاڤا ھورمزێ و شکاندنا سەروەریا ئیرانێ یا ل سەر ڤێ رێیا ستراتەژیکە.

ب گھیشتنا ڤان ھێزێن دەریایی، پەیاما واشنگتۆنێ یا ژ بۆ تەھرانێ زەلالتر بوویە: یان لھەڤکرن،ی ژی ئیفلیجا ئابۆری و دۆرپێچەکە گشتگر.