ھێزێن ئامەریکایێ ب تەمامی ژ بارەگەھا قەسرکێ ڤەکشیان: نەخشەیا لەشکەری تێ گوھەرتن
پرۆسەیا ڤەکشینا ھێزێن ئامەریکایێ ژ ئاخا سووریەیێ و رۆژئاڤایێ کوردستانێ دەرباسی قۆناغەکە نوو بوو. ل گۆری زانیاریێن مەیدانی، تەڤاھیا ھێزێن ئامەریکایێ ژ بارەگەھا ستراتەژیکا قەسرکێ ڤەکشیان و بەرێ خوە دان وەلاتێ ئوردنێ. ئەڤ گاڤا داوی پشتی بریارا سەرۆکێ ئامەریکایێ دۆنالد ترامپ یا ژ بۆ داویانینا ھەبوونا لەشکەری ل سووریەیێ ھات ئاڤێتن.
ل گۆری زانیاریان، ڤالاکرنا بارەگەھا قەسرکێ ب چەند قۆناغان ھات ئەنجامدان. بەریا نھا د مەھێن سباتێ دە ژی چەندین کاروانێن لەشکەری کو ژ زریپۆش و وەساییتێن گران پێک دھاتن، بەر ب سینۆرێن ئیراقێ ڤە ھاتبوون شاندن. قەسرک وەکی یەک ژ مەزنترین و گرنگترین ناڤەندێن ئامەریکایێ ل ھەرێمێ دھات ناسکرن، لەوما ڤالاکرنا وێ باندۆرەکە راستەراست ل سەر ھەڤسەنگیێن ھێزێ دکە.
پشتی ڤالاکرنا بارەگەھێ، گوھەرتنەکە گرنگ د پێکھاتەیا پاراستنا دەڤەرێ دە روو دا. بریار ھات دایین کو “فیرقەیا 60” یا ئارتێشا سووریەیێ ل شوونا ھێزێن ئامەریکایێ ل بارەگەھا قەسرکێ وەرە بجھکرن. ھێژایی گۆتنێیە کو ئەڤ فیرقە د بنگەھ دە ژ شەرڤانێن ھێزێن سووریەیا دەمۆکراتیک (ھەسەدێ) پێک تێ و د چارچۆڤەیا رێکەفتنێن نوو دە ئەرکێ پاراستنا ڤێ خالێ ژ وان رە ھاتی راسپارتن.
ل ھەرێمێن دن یێن بن کۆنترۆلا ئامەریکایێ دە ژی سەرەدەریا ب بارەگەھان رە ب ڤی ئاوایییە:
بارەگەھا شەدادێ: ھێزێن ئامەریکایێ پشتی ڤەکشینێ بەشەک ژێ رووخاند و بەشێ دن رادەستی حکوومەتا سووریەیێ کر.
بارەگەھا تەلبێدەر: ئەڤ خالا نێزیکی قەسرکێ رادەستی لیوایەکە سەر ب ھەسەدێ ڤە ھات کرن.
بارەگەھا خەراب ئەل-جیر: ئەڤ بنگەھ کو دکەڤە ناڤبەرا تلکۆچەر و رمێلانێ، نھا وەکی تەکانە پێگەھ مایە کو هێژ ھێزێن ئامەریکایێ لێ ئامادە نە.
ئەڤ گەشەدان نیشان ددن کو ل ھەرێمێ نەخشەیا کۆنترۆلێ ژ نوو ڤە تێ دارشتن و د ناڤبەرا ھێزێن ناڤخوەیی و ناڤدەولەتی دە قۆناغەکە نوویا لەشکەری دەست پێ کریە.
