ئیرانێ جارەکە دن تەنگاڤا ھورمزێ گرت

بارەگەھا “خاتەمول-ئەنبیا”یا سەر ب پاسدارێن ئیرانێ ڤە راگھاند، وان تەنگاڤا ھورمزێ یا ستراتەژیک جارەکە دن گرتیە و ئامەریکایێ ب “شکاندنا سۆزان” و “چەتەتیا دەریایی” تاوانبار کر.

بەردەڤکێ بارەگەھا “خاتەمول-ئەنبیا” ئیبراھیم زولفەقاری، ئیرۆ 18ێ نیسانێ راگھاند، کۆنترۆلا تەنگاڤا ھورمزێ ڤەگەریا رەوشا بەرێ و ھێزێن چەکدارێن ئیرانێ ب توندی چاڤدێریا ڤێ دەڤەرا ستراتەژیک دکن.

زولفەقاری دەستنیشان کر، وان بەرێ ل سەر بنگەھا “نیەتا باش” و دانووستاندنان رێ دابوو کو ھەژمارەکە سینۆرکرییا کەشتیێن بازرگانی و پەترۆلێ د بن چاڤدێریێ دە دەرباس ببن. لێ بەلێ، زولفەقاری گۆت: “ئامەریکایێ وەک ھەر جار سۆزێن خوە شکاندن و ب ناڤێ ئامبارگۆیێ بەردەوامە ل سەر چەتەتیا دەریایی یا ل دژی وەلاتێ مە. ژ بەر ڤێ یەکێ، مە بریار دا کو تەنگاڤێ ب تەمامی بگرن.”

ئەڤ بریارا فەرمانداریا لەشکەرییا ئیرانێ د دەمەکێ دە تێ، دوھ وەزیرێ دەرڤە یێ ئیرانێ عەباس عه‌راقچی راگھاندبوو، ھەڤدەم لگەل ئاگربەستا ل لبنانێ، تەنگاڤا ھورمزێ دێ ب تەمامی ب روویێ ھەموو کەشتیێن بازرگانی دە ڤەکری بە.

سەرۆکێ ئامەریکایێ دۆنالد ترامپ پشتی داخویانیێن عه‌راقچی د پەیامەکێ دە ل سەر تۆرا جڤاکییا “تروس سۆشیال” سپاسیا رایەدارێن ئیرانێ کربوو کو تەنگاڤ ڤەکرنە. ترامپ د پەیاما خوە دە ناڤێ “تەنگاڤا ئیرانێ” ل وێ تەنگاڤێ کربوو.