ئامهریكا بۆ وهلاتیێن خوه: دەملدەست ژ ئیراقێ دهركهڤن
بالیۆزخانەیا ئامەریکا یا ل بهغدایێ ئیرۆ ھشیاریەکە ئەولەھیێ یا بلند بەلاڤ کر و تێ دە راگھاند؛ کۆمێن چەکدار ل سەر دانانا پلانان ژ بۆ کرنا زێدەتر ئێریشان ل دژی وەلاتیێن ئامەریکایی و بەرژەوەندیێن وی وەلاتی ل سەرانسەرێ ئیراقێ بەردەوامن.
بالیۆزخانەیا ئامەریکا یا ل بهغدایێ ئیرۆ رۆژا دوشهمی 20 نیسانا 2026ێ ب داخویانیهكێ گۆت: “ھین ژی ھنەک ئالیێن پەیوەندیدار ب حکوومەتا ئیراقێ رە، ب ئاوایەکی چالاک سیوانا سیاسی، دارایی و پشتگریا مەیدانی ژ بۆ ڤان کۆمێن چەکدار دابین دکن، ڤێ یەکێ ژی مەترسیێن ئەولەھیێ زێدەتر کرنە.”
بالیۆزخانەیا ئامەریکایێ ل سەر رەوشا گەشتکرنێ ژی ئاماژە دا، “ھەر چەند ئاسمانێ ئیراقێ ھاتیە ڤەکرن و گەشتێن بازرگانی یێن سینۆردار ھاتنە دەستپێکرن ژی، لێ خەتەرا بەردەواما مووشەک و درۆنان ل ئاسمانێ ئیراقێ ھەیە.”
ئامەریکا داخواز ژ وەلاتیێن خوە دکە کو ئاستا ھشیاریێ یا “پلە چار” ل بەر چاڤان وەربگرن، کو ب مانایا “گەشتنەکرنا ژ بۆ ئیراقێ” تێ، و دبێژە: “ژ بۆ چ مەبەستەکێ گەشتێ ژ بۆ ئیراقێ نەکن. ئەگەر ل وێ دەرێ بن ژی، دەملدەست وی وەلاتی دهركهڤن.”
بالیۆزخانەیا ئامەریکایێ تەکەز ژی کر کو، تەڤی بریارا ڤالاکرنا ب نەچارییا پارەک ژ کارمەندێن وێ، نوونەریا دیپلۆماتیکا ئامەریکایێ ژ بۆ ھەڤکاریا وەلاتیان ل سەر کارێ خوە بەردەوامە. د ئەینی دەمێ دە ھشیاری دا کو ژ بەر خەتەرێن مەزن یێن ئەولەھیێ، وەلاتی بزاڤێ نەکن کو بچن د ناڤ بالیۆزخانەیێ یان نوونەریێن دیپلۆماتیک دە و تەنێ ب رێیا ئەمایلێ پەیوەندیێ بکن.
وێ داخویانیێ ل سەر رێیێن بەژایی ژی ئەشکەرە کریە کو، رێیێن بەر ب وەلاتێن ترکیە، ئوردن، کوەیت و عەرەبستانا سعوودی ڤە ھین ڤەکری نە، لێ گەشتیار دڤێ ھایداری دەرەنگکەتنەکە زێدە، بلندبوونا نرخێ بلێتان و گوھەرینێن ژ نشکێ ڤە بن. ھەروەسا ھاتیە دیارکرن کو، گەشتێن ئاسمانی یێن بازرگانی یێن ژ کوەیتێ ژ بەر خەتەرا ئێریشان ھاتنە راوەستاندن.
