سەرۆکێ دادوەریا ئیرانێ: ئەگەرا دەستپێکرنا ئێریشێن ئامەریکایێ پر خورتە
سەرۆکێ دەستھلاتا دادوەریێ یا ئیرانێ غولام حوسێن موحسنی ئێژەی پێشبینی دکە کو ئامەریکا ئێریشێن خوەیێن لەشکەری نوو بکە. ئەڤ داخویانیا ئێژەی د دەمەکێ دە تێ کو ل ئیسلامابادا پاکستانێ ئامادەکاری ژ بۆ گەرەکە نوو یا دانوستاندنێن ناڤبەرا واشنگتۆن و تەھرانێ تێنە کرن.
سەرۆکێ دەستھلاتا دادوەریا ئیرانێ غولام حوسێن موحسنی ئێژەی ئیرۆ 21ێ نیسانێ راگھاند، دڤێ وەلاتێ وی ژ بۆ رووبرووبوونا ھەر ئێریشەکە ئامەریکایێ د ئامادەباشیا تام دە بە. ئێژەی دیار کر کو ئەگەرا دەستپێکرنا ئێریشان ژ ئالیێ “دژمن” ڤە نە دوورە، بەلکو “ئەگەرەکە پر خورتە.”
غولام حوسێن موحسنی ئێژەی راگھاند، “دژمن ب وی ئاوایی ل شەر دنێری کو دێ د دەمەکە پر کورت دە بگھە ئارمانجێن خوە. وان باوەر دکر کو ب رێیا چەکێن پێشکەفتی و ئەزموونێن شەرێ 12-رۆژی، ھەر وھا ب ئارمانجگرتنا رێبەرێ بلند و فەرمانبەرێن دن، دێ د ناڤ 24 یان 48 ساعەتان دە، ئان ژی د ھەفتەیەکێ دە ئەنجامێ بگرن.”
سەرۆکێ دادوەریا ئیرانێ دەستنیشان کر، پشتی دەرباسبوونا زێدەتری 40 رۆژان، ئامەریکا نەگھیشتیە ئارمانجێن خوە و وھا بەردەوام کر: “راستە مە مەزنێن خوە وندا کرن، لێ تشتا کو وان دخوەست پێک نەھات. بێگومان دژمنێ کو تێک چوویە ب ھێسانی دەڤ ژێ بەرنادە، ژ بەر وێ ئەگەرا دەستپێکرنا ئێریشێن وان یێن ھۆڤانە پر زێدەیە.”
ئێژەی تەکەز کر: “ئەڤ ئامادەباشیا سەدی سەدا کو ئەم بەحس دکن، ب ئیرادەیا مە ڤە گرێدایی یە. ھەر چەند ئیمکان و ئاموور گرینگ بن ژی، یا کو ھەتا نھا سەرکەفتن مسۆگەر کریە ئیرادەیا گەل بوویە. دڤێ د قۆناغا یەکەم دە ئیرادەیا مەیا رووبرووبوونێ ھەبە.”
ژ ئالیێ دن ڤە، بەرپرسێ راگھاندنێ د نڤیسگەھا سەرۆککۆماریا ئیرانێ دە مەھدی تەباتەبایی ھشیاری دا ئامەریکایێ و گۆت: “دژمن بەرێ ئیران جەرباندیە، ھەکە جارەکە دن بجەربینە، دێ بکەڤە ناڤ خەلەتیەکە پر مەزن.”
ئەڤ راگەشی د دەمەکێ دەیە کو سەرۆکێ ئامەریکا دۆنالد ترامپ داخواز ژ تەھرانێ کریە کو د دانوستاندنێن پاکستانێ دە بەردەوام بە. لێ بەلێ ترامپ ھشیاری دا کو رەدکرنا دیالۆگێ، دێ ئیرانێ رووبروویی “کێشەیێن بێوێنە” بکە.
