ل ئیرانێ بەشەک ژ فرۆکخانەیان جارەکە دن دەست ب کار کرن
پشتی راوەستانا گەشتێن ئاسمانی کو ژ بەر شەرت و مەرجێن شەر پێک ھاتبوو، رایەدارێن ئیرانێ راگھاندن کو بەشەک ژ فرۆکخانەیێن وەلات دەریێن خوە ژ نوو ڤە ڤەکرنە. ل گۆری داخویانیان، فرۆکەخانەیێن کو زیان دیتنە دێ گاڤ ب گاڤ وەرن سەرەراستکرن.
محەمەد ئەمیرانی، بەرپرسێ کۆمپانیایا بالافرگەھ و گەشتێن ئەسمانی یا ئیرانێ، ئیرۆ 25ێ نیسانا 2026ێ ژ ئاژانسا فەرمی یا ئیرانێ “ئیرنا”یێ رە ئاخڤی. ئەمیرانی دیار کر کو ل پارێزگەھێن مینا مەشھەد، زاھیدان، کەرمان، یەزد و بیرجەندێ گەشتێن ئاسمانی ب ئاوایەکی ئاسایی و بێ پرسگرێک دەست پێ کرنە.
ئەمیرانی دەستنیشان کر کو ل ھنەک ناڤەندێن دن ژ بەر سەدەمێن تەکنیکی و ئەولەھیێ، گەشت ھین ب ئاوایەکی سینۆردار تێن کرن. ئەڤ باژارێن کو چالاکی تێ دە سینۆردارن ئەڤن:
تەورێز، کرماشان، ئەھواز و ئورمیە (رۆژھلاتێ کوردستانێ)
ئیلام، ئابادان، ئیسفەھان، شیراز و رەشت
فرۆکخانەیا مەھراباد (تەھران)
ھات دیارکرن کو ب تایبەتی فرۆکخانەیا ئورمیەیێ کو د ئەنجاما شەر دە زیان دیتبوو، پشتی تەمامبوونا کارێن تەکنیکی دێ گاڤ ب گاڤ ئامادە ببە بۆ گەشتێن بەرفرەھتر.
بەرپرسێ کۆمپانیایێ تەکەز کر کو پاراستنا ئەولەھیا گەشتیاران ژ بۆ وان د سەر ھەر تشتی رەیە. ھەر وھا ئەشکەرە کر کو وان ب ھێلێن ئاسمانی یێن بیانی رە دەست ب گۆتووبێژان کریە. ئارمانجا ڤان ھەڤدیتنان ئەوە کو رەوشا رێیێن ئاسمانی یێن ئیرانێ زەلال بکن و گەشتێن ترانزیت (ناڤدەولەتی)یێن کو د سەر ئاخا ئیرانێ رە دەرباس دبن، ژ نوو ڤە رێک بخن.
