ھاکان فیدان: ترکیە ئامادەیە دەرتەنگا ھورمزێ ژ مینان پاقژ بکە
وەزیرێ دەرڤەیێ ترکیەیێ ھاکان فدان راگھاند کو ئەگەر ئامەریکا و ئیران بگھیژن پەیمانەکە ئاشتیێ، وەلاتێ وی ئامادەیە بەشداری ئۆپەراسیۆنێن ناڤدەولەتی یێن ژ بۆ پاقژکرنا مینێن ل دەرتەنگا ھورمزێ ببە. فیدان ئەڤ گاڤ وەکی “ئەرکەکێ مرۆڤی” پێناسە کر و دەستنیشان کر کو ئارمانجا وان ئاساییکرنا رەوشا گەشتێن دەریایییە.
رۆژا شەمیێ، 25ێ نیسانا 2026ێ، ھاکان فیدان ل لەندەنێ د جڤینەکا لگەل رۆژنامەڤانان دە دیار کر کو ئەنقەرە ب ئەرێنی ل پرۆسەیا راکرنا مینێن دەریایی یێن ل دەرتەنگا ھورمزێ دنێرە. فیدان گۆت: “تێ پایین کو پشتی ئیمزەکرنا پەیمانا ئاشتیێ، تیمەکا تەکنیکی ژ وەلاتێن جودا دەست ب پاقژکرنا دەرتەنگا هۆرمز بکن؛ ترکیە ژی ئامادەیە د ڤێ ئەرکا تەکنیکی دە ئالیکاریێ بکە.”
وەزیرێ دەرڤەیێ ترکیەیێ تەکەز کر کو بەشداریا وەلاتێ وی تەنێ ژ بۆ مەبەستێن تەکنیکییە، نە سەربازی. فیدان ھشیاریەکە زەلال دا و گۆت، “ئەنقەرە ب چ ئاوایی نابە پارچەیەک ژ ئۆپەراسیۆنەکێ کو وەلاتێ مە وەکی ئالیەکی د ناڤ پەڤچوونەکا نوو دە نیشان بدە. ئەگەر د پێشەرۆژێ دە چ ھەڤپەیمانیەک بەر ب ئالیگری یان شەر ڤە بچە، ترکیە دێ د ھەلوەستا خوە دە ڤەگەرە.”
ھاکان فیدان د دەربارێ کریزا ناڤدەولەتی یا ل سەر بەرنامەیا ئاتۆمی یا ئیرانێ دە ژی گەشبینیا خوە نیشان دا. وی ھێڤی کر کو ئەڤ پرسگرێک د گەرا بهێت یا دانوستاندنێن کو دێ ل پاکستانێ بێن کرن دە وەرن چارەسەرکرن. فیدان د داویێ دە ئانی زمان کو ئارمانجا سەرەکی یا ترکیەیێ ئەوە کو گەشتێن کەشتیان ل دەرتەنگا ھورمزێ ب ئەولەھی و بێیی دایینا باج و رسمێن زێدە، ڤەگەرن رەوشا خوەیا ئاسایی.
