د شیڤخوارنا ترامپ لگەل رۆژنامەڤانان دە تەقە روو دا: ئێریشکەر ھاتە گرتن

د دەما شیڤخوارنا تایبەتا سەرۆکێ ئامەریکایێ دۆنالد ترامپ یا لگەل رۆژنامەڤانان دە، بوویەرەکە تەقەکرنێ روو دا و ترس و فکار خست ناڤ ئامادەبوویان. بوویەر ل ھۆتێلا “ھلتۆن واشنگتۆن”ێ، د دەما کو ترامپ لگەل جیگرێ سەرۆک جەی.دی. ڤانس، وەزیرێ پاراستنێ پیت ھێگسێت و ھەژمارەکە زێدەیا رۆژنامەڤانان جڤیابوو، قەومی. د ئەنجاما تەقەیێ دە پۆلیسەک بریندار بوو، لێ ترامپ و بەرپرسێن دن ب سلامەتی ژ ھۆلێ ھاتن دوورخستن.

پشتی کۆنترۆلکرنا رەوشێ ژ ئالیێ ھێزا ڤەشارتی ڤە، ناسنامەیا ئێریشکەر ھاتە ئەشکەرە کرن. ل گۆری داخویانیا دەزگەھا ئێف بی ئای و مەدیایا ئامەریکایێ، ئێریشکەر کەسەکی 31 سالییێ ب ناڤێ جۆلی تۆماس کو خەلکێ ویلایەتا کالیفۆرنیایێیە. ئێف بی ئای راگھاند کو جۆلی ھەول دایە ب چەکەکێ دەرباسی ناڤ ھۆلا سەرەکە ببە کو تێ دە نێزیکی 2600 کەس ئامادە بوون، لێ بەریا کو بگھیژە ئارمانجا خوە ھاتە ئاستەنگکرن.

سەرۆک دۆنالد ترامپ پشتی بوویەرێ داخویانیەک دا و ھەول دا فکارێن ناڤدەولەتی کێم بکە. ترامپ ئێریشکەر وەکی “کەسەکی نەخوەشێ دەروونی” و “گورەکی تەنێ” ب ناڤ کر. سەرۆکێ ئامەریکایێ تەکەز کر کو ئەڤ ئێریش ب ئاوایەکی کەساتی ھاتیە کرن و چ پەیوەندیا وێ ب راگەشیا لەشکەری یا د ناڤبەرا ئامەریکا و ئیرانێ دە نینە.

دۆزگەریا گشتی یا ئامەریکایێ راگھاند کو ئێریشکار دێ سبە ب فەرمی دەرکەڤە پێشبەری دادوەر. پارێزەرا ناڤدار جینین پیڕۆ دیار کر کو تۆمەتێن گران وەکی “بکارئانینا چەکێن گەرم”، “ئێریشی سەر پۆلیسێن فەدەرال” و “مەترسیا ل سەر ئەولەھیا نەتەوەیی” ل بەندا ئێریشکەرن. ئەڤ بوویەر د دەمەکێ دە روو ددە کو ل واشنگتۆنێ تەدبیرێن ئەولەھیێ گھیشتنە ئاستا ھەری بلند.