ئێن بی سی: ئێریشێن ئیرانێ ب ملیاران دۆلار زەرار گەھاندنە بارەگەھێن ئامەریکایێ

تۆڕا نووچەیان یا ئامەریکی (NBC) د راپۆرەکە مەیدانی دە ئەشکەرە کر کو ئێریشێن ئیرانێ یێن ل سەر بارەگەھ و سازیێن سەربازی یێن ئامەریکایێ ل ھەرێما کەنداڤ و رۆژھلاتا ناڤین، زەرارەکە دارایی یا مەزن یا ب قاسی ملیاران دۆلاران ل پەی خوە ھشتیە.

ل گۆری زانیاریێن کو شەش سەرچاوەیێن ئاگاھدار دانە تۆڕا NBC، ئەڤ ئێریش بوونە سەدەما وێرانبوونەکە بەرفرەھ د بنەسازیا سەربازی یا ئامەریکایێ دە ل چەندین وەلاتێن ھەرێمێ. زەرارێن ھاتنە تەسپیتکرن ئەڤن: تێکچوونا رێیێن فرینا بالافران، ژ کارکەتنا سیستەمێن رادارێ یێن پێشکەفتی، رووخاندنا مەخزەنێن چەک و جەبلخانەیان و زەراردیتنا ناڤەندێن پەیوەندیێن سەتەلایتی.

زەرارێن ل وەلاتێن ھەرێمێ ب بەرفرەھی:

د راپۆرێ دە ھاتیە دیارکرن کو چەندین بارەگەھێن ستراتەژیک رووبروویێ وێرانبوونا گران بوونە، ژ وان:

کووەیت: بارەگەھێن “کامپ بۆهێرینگ” و “عەلی سالم”، تەڤی چەندین دەپۆ و بەندەران.

ئیمارات: بارەگەھێن “زەفرە” و “روەیس”.

عەرەبستانا سعوودی: بارەگەھا ئاسمانی یا “شازادە سولتان”.

ئوردون: بارەگەھا ئاسمانی یا “مووەفەق سەلتی”.

قەتەر: رێیێن فرینێ یێن ل بارەگەھا مەزنا “عودەیدە”.

بەحرەین: ئاڤاھیا سەرەکەیا فەرمانداریا ھێزێن دەریایی یا ئامەریکایێ (فەرماندەیی بەلەمی پێنجەم). تێ گۆتن تەنێ چێکرنا ڤێ ئاڤاھیێ دێ 200 میلیۆن دۆلار لێ بچە.

ھەمان چاڤکانیان ئەشکەرە کرنە کو د ئەنجاما ئێریشان دە، ب دەھان بالافرێن بێمرۆڤ (درۆن)یێن ژ جورەیێ MQ-9 Reaper، بالافرەکە شەر، دو بالافرێن ڤەگوھاستنا سۆتەمەنیێ، چەندین ھەلیکۆپتەر و بالافرێن سیخوریێ ھاتنە تێکبرن. ھەر وھا ھەری کێم دو سیستەمێن پاراستنا ئاسمانی (پاتریۆت) ب تەمامی ژ کار کەتنە.

ل گۆری راپۆرێ، تێ چاڤەرێکرن کو تەنێ چێکرنا بنەسازیا بارەگەھان 5 میلیار دۆلار لێ بچە، بێیی کو بھایێ بالافر و سیستەمێن پاراستنێ یێن گرانبھا وەرە حەسباندن.

وەزارەتا بەرەڤانیێ یا ئامەریکایێ (پەنتاگۆن) ھەتا نھا نەخوەستیە ل سەر ڤێ راپۆرێ ت داخویانیان بدە. ئەڤ یەک د دەمەکێ دەیە کو پەنتاگۆنێ بەرێ راگھاندبوو کو تەنێ د شەش رۆژێن پێشین یێن شەر دە، مەسرەفێن وان ژ 11.3 میلیار دۆلاران دەرباس بوویە، کو نیڤا ڤی دراڤی تەنێ ژ بۆ جەبلخانەیێن دو رۆژێن پێشین ھاتنە خەرجکرن.