ئۆزگوور ئۆزەل دیرۆکا ھلبژارتنێ ئەشکەرە کر: “ھەری دەرەنگ جۆتمەھا 2027ێ”

سەرۆکێ گشتی یێ جەهەپێ ئۆزگوور ئۆزەل، دەربارێ دەما ھلبژارتنێن گشتی دە داخویانیێن بالکێش دان. ئۆزەل دەستنیشان کر کو ل گۆری نیشانەیێن سیاسی یێن ل ئەنقەرەیێ، ھلبژارتن دێ ھەری دەرەنگ د جۆتمەھا سالا 2027ێ دە وەرن لدارخستن و پارتیا وان ژ نھا ڤە کەتیە ئامادەکاریان.

ئۆزگوور ئۆزەل راگھاند کو جەهەپە دێ د 4ێ گولانێ دە ب فەرمی دەست ب کامپانیایا خوەیا ھلبژارتنێ بکە. ئۆزەل دیار کر کو ئەڤ کامپانیا دێ ب ستراتەژیەکە “360 پلەیی” وەرە مەشاندن و تەڤاھیا رێخستنێن پارتیێ دێ د ناڤ دە جھ بگرن. د ڤێ رۆژا دەستپێکێ دە، نە تەنێ رێخستن، لێ ئەندامێن مەجلیسا پارتیێ، کۆمیتەیا رێڤەبەریا ناڤەندی و ھەموو پارلامەنتەر دێ ل 81 پارێزگەھان داکەڤن قادان.

خەباتا سەرەکی یا جەهەپێ د ڤێ قۆناغێ دە دێ ل سەر تێکلیا یەک-ب-یەکا ب وەلاتیان رە بە. تایبەتمەندیێن ڤێ ستراتەژیێ وھا نە:

ئامادەکاری: 186.000 بەرپرسێن ناڤەندێن دەنگدانێ ھاتنە دیارکرن.

خەباتا قادێ: د 4ێ گولانێ دە 106.000 بەرپرس دێ راستەراست دەست ب خەباتێ بکن.

تێکلیا تایبەت: ھەر بەرپرسەک دێ ژ 300 ھلبژێران (نێزیکی 200 مالباتان) بەرپرسیار بە.

سەردانێن بەردەوام: سەردانێن یەکەم د گولانێ دە دەست پێ دکن و دێ د مەھێن ئیلۆن و جۆتمەھێ دە ب گەرا سێیەم و چارەم بەردەوام بکن.

سەرۆکێ جەهەپێ تەکەز کر کو بەرپرسێن وان دێ ھەر مەھ سەردانا مالان بکن، خوە بدن ناسین و پرۆژە و سۆزێن پارتیێ ژ بۆ چارەسەرکرنا پرسگرێکێن ئابۆری و جڤاکی راڤە بکن. ئۆزەل گۆت کو ئارمانجا وان نە تەنێ داخویانیێن سیاسی نە، لێ ئاڤاکرنا تێکلیەکە خورتا باوەریێیە داکو وەلاتی جەهەپێ وەکی چارەسەری ببینن.

ئۆزەل د داخویانیا خوە دە بال کشاند سەر زەختێن دادوەری یێن ل سەر پارتیا وان و دیار کر کو ب ڤێ خەباتا مەزنا قادێ، ئەوێ ھەم بەرسڤا ڤان زەختان بدن و ھەم ژی ل ھەر دەرێ ترکیەیێ دەنگێ وەلاتیێن کو ژ بەر کریزا ئابۆری دنالن، بلند بکن.