سی ئێن ئێن: شەرێ دەستھلاتێ ل تەھرانێ رێ ل لھەڤکرنا لگەل ترامپ گرتیە
تۆرا نووچەیان یا ئامەریکی (CNN) د راپۆرتەکە تایبەت دە ئەشکەرە کر کو دوبەرەکیێن کوور یێن د ناڤبەرا باسکێن دەستھلاتێ یێن ل تەھرانێ دە، بوونە ئاستەنگێ ھەری مەزن ل پێشیا ھەر ھەولدانەکە ژ بۆ ئاگربەست و لھەڤکرنا لگەل واشینتۆنێ. ل گۆری راپۆرتێ، ئیران د ناڤا “شەرێ دەستھلاتێ” دەیە و ناڤەندا بریاردانێ پشتی سەردەمەکێ تووشی پرت و بەلاڤبوونێ بوویە.
راپۆرت دەستنیشان دکە کو باسکێن توندرەو د ناڤ ئارتێشا پاسداران دە، ب تایبەتی کۆما کو ب ناڤێ “ئەنیا پایداری” تێ ناسکرن، ھەر دەرفەتەکە لھەڤکرنێ لەنگ دکن. ئەڤ ئالیێ توندرەو ب رێیا کۆنترۆلکرنا مەدیا، پارلامەن و زەختێن ل سەر جادەیێ، دژبەریا ھەر دانوستاندنەکێ لگەل ئیدارەیا دۆنالد ترامپ دکن. ئەو ھەر لھەڤکرنەکێ وەکی “تەسلیمبوونێ” پێناسە دکن و داخوازا بەردەوامیا شەر دکن.
چاڤدێرێن سیاسی دیار دکن کو ئەڤ ھەڤرکیا ناڤخوەیی ب تایبەتی پشتی کوشتنا رێبەرێ کۆمارا ئیسلامی یا ئیرانێ، عەلی خامنەیی، کو د دەستپێکا شەر دە روو دابوو، گھیشتیە لووتکەیێ. نەبوونا سەرۆکاتیەکە یەکگرتی بوویە سەدەم کو رایەدارێن ئامەریکایی، وەکی دۆنالد ترامپ و وەزیرێ دەرڤە مارکۆ روبیۆ، سەرۆکاتیا نوویا ئیرانێ وەکی “پرت و بەلاڤ” وەسف بکن و راگھینن کو تەھران نکارە بریارەکە یەکالی بدە.
د ڤێ ناڤبەرێ دە، واشینتۆن ھین ژی ل بەندا بەرسڤا فەرمی یا تەھرانێیە دەربارێ پێشنیارا داوی یا ژ بۆ بداویکرنا شەر و ڤەکرنا تەنگاڤا ھورمزێ. تەڤی کو ترامپ و روبیۆ پێشبینی دکرن کو د ناڤا چەند دەمژمێران دە ئەنجامەکێ ب دەست بخن، لێ دوبەرەکیێن ناڤخوەیی یێن ئیرانێ پێڤاژۆیا دانوستاندنان راوەستاندیە. ئەڤ راوەستاندن د دەمەکێ دەیە کو شەرێ ھەیی زێدەتری دو مەھن ب دژواری بەردەوام دکە.
