ئیران: ئامەریکایێ ل تەنگئاڤا ھورمزێ ئێریشی چەند بەلەمەیان کر

چاڤکانیەکە لەشکەری یا ئیرانێ راگھاند، ئارتێشا ئامەریکایێ ب ھنجەتا “ھێزێن پاسدار”، ئێریشی چەند بەلەمێن سڤیلان کریە و د ئەنجامێ دە 6 کەسان ژیانا خوە ژ دەست دانە.

ئاژانسا نووچەیان يا ته‌سنیمێ ئیرۆ 5ێ گولانێ ل سەر زارێ چاڤکانیەکە لەشکەرییا ئیرانێ بەلاڤ کر کو ئیدیعایێن ئارتێشا ئامەریکایێ یێن دەربارێ لێدانا “بەلەمێن بلەزێن ئیرانێ” نە راستن. ل گۆری داخویانیێ، ئەو بەلەمێن کو ژ ئالیێ ھێزێن ئامەریکایێ ڤە ھاتنە ئارمانجگرتن، ھەموو بەلەمێن سڤیلان بوون.

چاڤکانیا لەشکەرییا ئیرانی دەستنیشان کر، ئامەریکایێ 6 بەلەمێن سڤیلان کریە ئامانج و گۆت: “دو ژ ڤان بەلەمان کەلووپەلێن خەلکێ سڤیل تێ دە بوون و ژ ناڤچەیا خەسەبا ئۆمانێ بەر ب کێنارێن ئیرانێ ڤە د رێ دە بوون.”

ھاتە راگھاندن، د ئەنجاما ڤێ ئێریشێ دە 6 کەسان ژیانا خوە ژ دەست دانە. چاڤکانیێ ھشیاریەکە توند دا واشنگتۆنێ و راگھاند کو “دڤێ ئارتێشا ئامەریکایێ باجا ڤێ تاوانا خوە بدە.”

ھەمان چاڤکانیێ گۆت کو ئارتێشا ئامەریکایێ ژ بەر لەزا بەلەمێن “سۆپایێ پاسداران” کەتیە ناڤا ترس و دلتەنگیەکێ، لەوما ھەر بەلەما کو ل ھەرێمێ دبینن، گولەباران دکن. ھەتا نھا ناسنامەیا کەسێن ھاتنە کوشتن نەھاتیە ئەشکەرەکرن کو گەلۆ وەلاتیێن ئیرانێ نە ئان یێن وەلاتێن کەنداڤێ نە.

ئەڤ ئالۆزی د دەمەکێ دە نە کو ئامەریکایێ ب فەرمانا دۆنالد ترامپ ئۆپەراسیۆنا “پرۆژەیا ئازادیێ” ل تەنگاڤا ھورمزێ دایە دەستپێکرن. ئەڤ ئۆپەراسیۆن ژ ئالیێ فەرمانداریا ناڤەندییا ئامەریکایێ (سێنتكۆمێ) ڤە تێ برێڤەبرن و زێدەتری 100 بالافرێن شەر و 15 ھەزار لەشکەران ل ھەرێمێ دحەوینە.

ئامەریکا دبێژە ئارمانجا وان پاراستنا ئازادیا دەریاڤانی و چاڤدێریا دۆرپێچا ل سەر بەندەرێن ئیرانێ یە. لێ بەلێ بەرپرسێن ئیرانێ ھشیاری ددن کو ھەر دەستوەردانەکە لەشکەرییا ئامەریکایێ ل ڤێ ناڤچەیێ، وەکی “بنپێکرنا ئاگربەستێ” تێ دیتن و دێ ببە سەدەما کارەساتێن مەزن.