روویێ راستین یێ پەکەکێ: ئاپۆجیتی – ئاپۆپەرەستی و بەرھەوابوونا گەلەکێ…

دۆھ سالڤەگەرا یەکەمنا خوە ھلوەشاندنا پەکەکێ و دەستژێبەردانا تێکۆشینا چەکداری بوو. ل سەر مژارا کا پەکەکە دێ خوە چاوا تەڤگەر بکە و پشتی ھلوەشاندنا خوە دێ چ ناڤی بگرە، بەندەواریەک ھەبوو. دۆھ، قاراسو و سۆزدار ئاڤێستا، رێبەرێن پەکەکەیا ھلوەشیایی، داخویانیەک خوەندن کو خوە وەکی “رێڤەبەریا تەڤگەرا ئاپۆیی” ب ناڤ دکرن. ئەڤ تێ ڤێ واتەیێ کو ئەو دێ ئێدی ناڤێ “رێڤەبەریا تەڤگەرا ئاپۆیی” بکار بینن.

پشتی پەکەکێ خوە ھلوەشاندی نیقاشێن ل سەر شێوازێ تەڤگەرێ و ناڤێ وێ ھەبوون. ئۆجالان د نۆتێن ھەڤدینێن خوە و پرتووکا خوەیا داوی دە دەستنیشان کربوو کو ئەو دخوازە ناڤێ تەڤگەرا نوو وەکی “تەڤگەرا کۆمونالیستا دەمۆکراتیک” بدانە. د ڤێ سەردەما ناڤبەرێ دە، ناڤێ کەجەکێ کێم جاران دھات بکار ئانین دا کو ژ بەرتەکا دەولەتێ دوور بکەڤە. وەکی دن، کەجەکێ ب راستی خوە نە ھلوەشاندیە. لێبەلێ، ناڤێ “ئاکادەمیا زانستێن جڤاکی یا عەڤدللا ئۆجالان” ب گرانی دھات بکار ئانین. و جڤینا داوین د بن ناڤێ “رێڤەبەریا تەڤگەرا ئاپۆیی” دە ھات لدارخستن.

ئەڤ ناڤ ب ئیحتیمالەک مەزن ژ ھێلا ئۆجالان ب خوە ڤە ھات پێشنیار کرن. ژ بۆ سەرۆکاتیا پەکەکێ بێیی ئەرێکرنا ئۆجالان نە موومکنە کو ل سەر مژارەک ووسا تەڤبگەرن.

ژ ئالیێ فەلسەفی ڤە، ناڤ نە تەنێ ژ بۆ بەحسا کەسەک، کۆمەک ئان تشتەکی نە؛ ئەو د دەستنیشانکرنا بنگەھا ھەبوونێ، واتەیا جیھانی و ناسنامەیا وێ دە بنگەھینن. یانی، ھوون ل گۆری ناڤێ خوە ئیماژەکێ دئافرینن.

دەما کو پەکەکە جارا یەکەم دەرکەت ھۆلێ، ھەتا د قۆناغا خوەیا کۆمێ دە ژی، ل ئەنقەرێ خوە وەکی “نەتەوەیی” ب ناڤ کر.

د وێ دەمێ دە، د ناڤ چەپگرێن ترک و کوردان دە کەڤنەشۆپیەک ھەبوو کو هەر تەڤگەرەک ب ناڤێ سەرۆکێن خوە دھات پێناسەکرن. بارزانی، کایپاککایی، قڤلجمجی و گەلەک تەڤگەرێن دن ب ڤی رەنگی دھاتن بناڤکرن. پەکەکێ ھەتا سالا 1977ێ خوە وەکی گرووپا نەتەوەیی ب ناڤ دکر. لێبەلێ، پشتی کو ئۆجالان د سالا 1977ێ دە لگەل نەجات کایا-پیلۆت، کو وەکی ئاژانەک دەولەتێ دھات ناسین، چوو سەرەدانا کوردستانێ، پیلۆت نەجات د جڤینان دە ناڤێ “ئاپۆجی” ب دەنگەکی نزم دگۆت. پاشێ، د پەڤچوونێن ھیڤان-سیڤەرەکێ دە، دەما کو پەکەکە لگەل عەشیرێن بوجاخ و سلەیمانییان پەڤچوون، ناڤێ “ئاپۆجی” ل رووحایێ بەلاڤ بوو. ب کورتاسی، ناڤێ “ئاپۆجی” جارا یەکەم ژ ھێلا پیلۆت نەجات، ئاژانەک ترک و عەشیرێن رووحایێ بکار ئانین.

لێبەلێ، مەزلووم دۆغان یەکەم کەس بوو کو د کۆنگرەیا دامەزراندنا پەکەکێ دە ل دژی ڤێ پێناسەیێ دەرکەت و گۆت، “دڤێت ئەم ببن پارتیەک خوەدی بەرنامە و رێزکنامەیەک.” پاشێ، کەمال پیر د زیندانا ئامەدێ دە پێشبەری دۆزگەری گۆت ئەم وەکە “ئاپۆجی” پێناسەکرن سڤاکتی و بێروومەت کرنا مەیە.

ژ سالێن 1980 ھەتا سالێن 2000، تەڤگەرەکێ ھەکە ناڤێ کوردستانێ ل سەر نەبا نەدکاری ل کوردستانێ بژی. پەکەکێ، وەکە کو ناڤ ل خوە کری کوردستان پێڤە کر، ناڤێ کوردستانێ ل ھەمی سازی و دەزگەھێن خوە وەکە: ئارتێش، ئەنیا شەر، تەڤگەرا ژنان، تەڤگەرا ئۆلداران، جوان، رەوشەنبیر بکار ئانین. ب ڤی رەنگی وان کورد ل دۆرا خوە کۆم کرن. دەما کو ئۆجالان دەست ب ژیانا ل ئیمرالیێ کر، رەوش گوھەری. پەیڤا “دەمۆکراتیک” ل ھەر تشتی ھات زێدەکرن: جوان، ژن، جڤاک، ئیدەۆلۆژی، پارتی، ھتد. پەیڤا دەمۆکراتیک پێڤە ھات زەلقاندن.

نھا، تێگەھێن وەکی کۆمونالیزم و ئەنتەگراسیۆنێ تێنە بکار ئانین. و نھا ھەر تشت ل سەر ئاپۆجیتی ھاتیە ئاڤاکرن… د وێژەیا نوویا پەکەکێ دە، تێگەھێن

کوردستان، تێکۆشینا نەتەوەیی یا کورد و ئازادیا کوردستانێ تونە نە – ژ بلی بکارئانینا وان یا سینۆردارکری ژ بۆ سەردابرنا گرسەیا خوە.

ب سالان، پەکەکێ کو ھەموو پێکھاتە، سازی و پارتیێن جڤاکی یێن کورد وەکی پاشڤەروو، کەڤنەشۆپ، رەفۆرمیست، رزی، گەندەل ددیت، لێ د داویێ دە پەکەکە ڤەگوھەری تەریقەتەکا وەکە شێخ-مرید-مەزھەب. تێگەھێن ئۆجالان یێن جڤاکا ئازاد، جڤاکا کۆموونال، جڤاکا بێدەولەت، جڤاکا رزگاریا زایەندی، جڤاکا ئەکۆلۆژیک و جڤاکا خوەسەرا دەمۆکراتیک تەنێ پرۆپاگاندایا ڤێ تەریقەتێیە.

د سالێن 1980 دە، دەولەتا ترک ب زانەبوون سیاسەتەکە تەریقەت-جەماعەت پێشخست دا کو بکاربە جڤاکێ کۆنترۆل بکە. جڤاکا ترکیێ ب رێیا تەریقەت و جەماعەتێن وەکی ئیسماعیل ئاغا، جەماعەتا مەنزیل، جەماعەتا ئیسکەندەر پاشا دھات برێڤەبرن. ل بەر ڤێ پێلا دەولەتێ، بەھرا کوردان ژی تەریقەتا ئاپۆجی کەت.

مە بەرێ دە ژی گۆتیە کو پەکەکە نە تەڤگەرەکە مۆدەرنە، بەلکو تەریقەتەکە، کو ئەو ھەر کەسێ ل دەرڤەیی تەریقەتا خوە وەکی کافر و منافق دبینە، و ئەڤ پۆلیتیکایەکە دەولەتا ترکە. وێ دەمێ، ژ مە رە دگۆتن، “پەکەکە تەڤگەرەکە رێبەرتیێ یە، ئەو دێ یەکیتیا کوردان چێبکە” و ھتد. نھا، مینا کەریەکێ پەزێ کو د لاتێ دە دچە، ھندەک کورد بوونە مریدێن تەریقەتا ئاپۆیی.

نە ئۆجالان، نە پەکەکە و نە ژی تەڤگەرا ئاپۆیی د چ داخویانیەکا نڤیسکی یا فەرمی دە بەحسا مافێ زمانێ دایکێ، مافێ سەروەریا کوردان، یان مافێ خوەرێڤەبەریێ ژ بۆ کوردان نەکریە. تەنێ د نامەیێن د ناڤبەرا وان دە دھێنودچن مژارێن ب ڤی رەنگی ژ بۆ بەرتەکا رایا گشتی بسەکنینن، چاپەمەنیا پەکەکێ دە ب رێزک کورت بەحسا کوردان دکن. لێبەلێ، تەنێ خالەک سابت ھەیە ئەو ژی ئازادیا ئۆجالان.

یێن کو ژ بۆ ئازادکرنا کوردان دەست ب خەباتان کرنە، ھەموو کوردان بەر ب بێناسنامەیی و بێ نەتەوییەتێ دبن. 48 سال بەرێ، پەکەکێ ب گۆتنا “کوردستانا یەکگرتی یا سەربخوە” کورد پەی خوە کشاندن. یێن کو سواری وێ قیتارێ بوون، نھا ب ناڤێ ئازادیا ئۆجالان و تەڤگەرا ئاپۆیی رێویتیێ بێروومەتییێ دکن. ئەڤ لیستکەکە، ئەڤ کۆمپلۆیەک ل دژی کوردانە و ئەڤ پرۆژەیەکە.

ئەڤ بێرێزییەکە ل ھەمبەر کور، کەچ، و خوینا کوردان یا ھاتی رژاندن، نەمازە ل باکوورێ کوردستانێ.

ڤەگوھەراندنا کوردان بۆ تەریقەتەکێ پلانا ل دۆرا ئۆجالان، کو ژ رابردوویا وان یا تاری سوود وەردگرن، پرۆژەیەک دەولەتێیە.

بکارئانینا ئەشکەرە و فەرمی یا ناڤێ “تەڤگەرا ئاپۆجی” ژ ئالیێ پەکەکێ پێناسەکا پر گونجاو و راستە. یا راستین ئەڤە کو پەکەکە ت تێکلیا خوە ب کوردیتیێ، کوردستانێ یان ژی تێکۆشینا ئازادیێ رە تونە. دەولەتا ترک پشتگریێ ددە ڤێ تەریقەتێ دا کو بکاربە کوردان ل  دۆرا ڤێ تەریقەتا ئاپۆی ئیقامە بکە. بێ گومان، ئەو کەسێن کو ل کوردستانێ مریدێن ئۆجالانن و یێن ب باوەرییا تێکۆشینا نەتەوەیی یا کورد تینن ژ ھەڤ ڤەقەتن.

ل کوردستانێ، دڤێت وەلاتپارێز و مرید رێکێن خوە ژ ھەڤ جوودا بکن.