پەکەکێ د گولانا 2025ێ دە کۆنگرەیەک دارخست و راگھاند کو دەست ژ تێکۆشینا چەکداری بەرددە و خوە ھلدوەشینە. سالەک ل سەر ڤێ بریارێ رە دەرباس بوو. د سالڤەگەرا یەکەما ھلوەشاندنا پەکەکێ دە، داخویانیەکە رێبەرێن پەکەکێ مستەفا قاراسوو و نووریە کەسبر (سۆزدار ئاڤێستا) د مەدیایێ دە جھ گرت. ئاخافتنا وان زێدە بالا خەلکێ نەکشاند؛ ژ بەر کو ئەو دوبارەکرنا ئاخافتنێن بەرێ بوو. تەنێ تشتێ کو بالا مرۆڤ کشاند، ناڤێ کو ل شوونا پەکەکێ بکار ئانین بوو: رێڤەبەریا تەڤگەرا ئاپۆیی…
بێگومان د مەدیایا جڤاکی دە نیقاشەک چێبوو: “گەلۆ ناڤێ نوویێ پەکەکێ “تەڤگەرا ئاپۆیی یە؟”
ما ناڤێ پەکەکێ یێ نوو ب راستی “رێڤەبەریا تەڤگەرا ئاپۆیی”یە؟ پشتی کو پەکەکێ ب فەرمانا ئۆجالان خوە ھلوەشاند، رێبەرێن بەرێ یێن پەکەکێ جارنان د بن ناڤێ کەجەکێ دە داخویانی ددان. لێ بەلێ، بەشەکی گرینگ ب گشتی سەرناڤێ “ئەندامێ ئاکادەمیا زانستێن جڤاکی یا عەبدوللاھ ئۆجالان” بکار دئانی. ب قاسی کو ئەم دزانین، د تەعلیماتێن کو ئۆجالان ژ پەکەکێ رە شاندبوون دە، وی ژ بۆ تەڤگەرا نوو ناڤێ “تەڤگەرا کۆمونێن دەمۆکراتیک” پێشنیار کربوو. لێ ئیرۆ، ناڤەکی نەزەلال وەک “رێڤەبەریا تەڤگەرا ئاپۆیی” ھات بکارئانین.
گەر ناڤێ نوویێ پەکەکێ “رێڤەبەریا تەڤگەرا ئاپۆیی” بە، وێ دەمێ ھەستیێن دامەزرینەرێن پێشەنگ مەزلووم دۆگان، خەیری دورموش و کەمال پیر یێن کو د سالێن 1980یێ دە ل زیندانا دیارباکرێ ھاتن ئیشکەنجەکرن و کوشتن دێ ئێشن. ژ بەر کو وان گۆتنا “ئاپۆجی” ژ بۆ خوە وەکی بێرێزی پێناسە دکر.
کەمال پیر، پێشەنگێ دامەزرینەرێ پەکەکێ، د سالا 1981ێ دە دەما کو د گرتیگەھێ دە بوو، ل دژی گۆتنا دادوەرا کو ژ وان رە دگۆت “ئاپۆجی” دەرکەت و د دادگەھێ دە وەھا گۆت: “ئەم ئاپۆجی نینن. ھنەک ئالیان ئەڤ ناڤ ژ بۆ کو مە سڤک بکن و رەش بکن ل مە کرن. پێناسەیا ‘ئاپۆجی’ ژ بۆ کو مە وەکی دلسۆزێن کەسەکی نیشان بدن ھاتە ئیجادکرن. لێ بەلێ، ئەم نە دلسۆزێن شەخسەکی نە. تشتەک وەکی ‘ھەگەر ئاپۆ نەبە، ئەڤ تەڤگەر ژی نابە’ نینە؛ عەبدوللاھ ب خوە ئەندامەکی ڤێ تەڤگەرێیە.”
نھا، چ داخویانیەکا فەرمی نینە کا پەکەکێ ناڤێ خوە گوھەرتیە یان نا، لێ ژ بۆ دیتنا رزین و پووچبوونا د ناڤ پەکەکێ دە، ئەڤ بەراوردکرن گرینگە: 45 سالان پشتی کەمال پیر، ئەندامەکی دن یێ پەکەکێ، ئامەد مەلازگرت، دبێژە: “ئەگەر کوردستانەک ھەبە و ئەڤ کوردستان بێیی رێبەر ئاپۆ بە، وێ ھنگێ ب رایا من یا شەخسی، پێویستی ب کوردستانەکە ووسا نینە.” کا ل ھەلوەستا کەمال پیر بنێرن و ل یا ئامەد مەلازگرتی بنێرن و وان بەراورد بکن…
ئەڤ رزین و پووچبوونە. ئەگەر تەڤگەرەک ب ڤی رەنگی ژ رێ دەرکەتبە، ئەڤ نە گوھەرتنە؛ لێ پووچبوونە، ھلوەشینە و خیانەتا ل میراتەیێ یە. ژ بەر ڤێ یەکێ، گوھەرینا ناڤێ پەکەکێ نە گرینگە. پشتی نیڤا سالێن 1980یێ، پەکەکێ فێم کر کو ناڤەک و لۆگۆیەک نوو د ناڤ شۆپینەرێن وێ دە کەلەجان، مەراق و ھێڤیێن نوو چێدکە. ژ بەر ڤێ یەکێ، ھەر گاڤا کو ئەو ب تەڤلیھەڤیەکێ رە روو ب روو دمینن، ناڤێن نوو و لۆگۆیێن نوو دئافرینن.
ژ سالێن 1980یێ ھەتا سالێن 1999ێ، ژ بۆ جۆش و خرۆشا جەماوەری، سەرناڤێ ھەر سازیەکێ “کوردستان” دانین. پشتی کو ئۆجالان دەست ب ژیانا ل ئیمرالیێ کر، ناڤێ “کوردستان” ھاتە ئاڤێتن و پەیڤا “دەمۆکراتیک” ل سەرناڤێ ھەر سازیەکێ ھاتە زێدەکرن. نھا، پشتی 2025ێ، ئێدی تشتەک ب ناڤێ کوردستانێ نەھشتن؛ ژ نھا و پێ ڤە، ھەر تشت دێ وەکی “تەڤگەرا ئاپۆیی” و “کۆمونالیزم” وەرە بناڤکرن…
یانی، رۆڤی چەند بگەرە ژی د داویێ دە ڤەدگەرە دکانا کوورکفرۆش “دوکانا کو تێ دە رۆڤی تێ کەڤلکرن و کەڤلێ وی دهێتە فرۆتن”. پەکەکێ ماسکەیا خوەیا کورد و کوردستانی ئاڤێت و ڤەگەریایە سەر جەوھەرێ خوە. ئێدی پەکەکێ ب خوە قەبوول کریە کو ئەو نە تەڤگەرەکە کورد و کوردستانییە.
پەکەکە تەڤگەرەکە مریدانە.
