د 11ێ نیسانێ دە، د بن بانێ پارلامەنتۆیا ئیراقێ دە، نە پێڤاژۆیەک دەمۆکراتیک، لێ بەلێ لیستکەکە مافیاواری یا ب ناڤێ “ھلبژارتنا سەرۆککۆماری” ھات لیستن. بافل تالابانی، ب کەسایەتیا خوەیا پۆزبلند و ئەزئەزی، ب کەسایەتیەکێ کو سینۆران ناس ناکە و ب تێنیبوونا دەستھلاتداریێ، ل گەل وان ئالیێن شیعە و سوننی یێن کو ھەبوونا کوردان وەکی ژەھرێ دبینن، ل سەر یەک سفرێ روونشت.
ھندەک ب بێشەرمی دبێژن ئەڤ “سەرکەفتنا یەنەکێیە.” گەلۆ ما ب راستی ئەڤە سەرکەفتنە؟ وەرن ئەم ل روویێ راستی یێ ڤێ شانۆیێ بنێرن:
پارتیەک کو د سندۆقان دە وندا کریە، چاوا “ب سەر دکەڤە”؟
گەلۆ یەنەکە د کیژان ھلبژارتنا رەوا دە بوویە پارتیا یەکەم؟
ما د ھلبژارتنێن 20ێ جۆتمەھا 2024ێ دە ب سەر کەتن؟ نا! ما د ھلبژارتنێن پارلامەنتۆیا ئیراقێ یێن 9ێ مژدارا 2025ێ دە سەرکەفتنەک بدەست خستن؟ قەت نا! نەخوە ئەڤ “سەرکەفتن” ژ کیژان قولێ دەرکەت؟ بەرسڤ زەلالە: بافل تالابانی چوو د ھەمبێزا دژمنێن سۆندخواری یێن کوردستانێ دە روونشت. وی سۆند خوار کو ببە خزمەتکارێ نەتەوەپەرەستێن عەرەب و شۆفینیستێن کو دەستکەفتیێن گەلێ کورد وەکی گەفەکێ دبینن. ئەڤ نە سەرکەفتنا سیاسییە؛ ئەڤ ب بھایێ فرۆتنا ئیرادەیا نەتەوەیی، بدەستخستنا کورسیەکا ب کرێیە.
11ێ نیسانێ: رۆژا مسۆگەرکرنا کورسیێ ب ھەڤکاریا دژمن
11ێ نیسانێ نە رۆژەکە کو پەدەکێ وندا کربە؛ ئەو رۆژا رەشە کو یەنەکێ ب ھەڤکاریا داگیرکەران کورسیێ خوەیێ لەرزۆک مسۆگەر کر. د سیاسەتێ دە دبێژن “کارێن بەرێ، گارانتیا کارێن پاشەرۆژێ نە.” نەخوە ئەم بنێرن کا بافل د دەھ سالێن داوی دە چ “گارانتی” دایە مە:
خیانەتا کەرکووکێ: بافل باژارەکی قەدیمێ وەکی کەرکووکێ رادەستی حەشدا شەعبی و پاسدارێن ئیرانێ کر. ژ بۆ پارێزگارەکی کو تەنێ ناڤێ وی یەنەکە بە، وی رێڤەبەریا چاندنیێ و سازیێن ستراتەژیک پێشکێشی عەرەبان کرن. ژ دەما سەدام ڤە جارا یەکەمە کو ب خێرا یەنەکێ، عەرەبکرن (تەعریب) ب ڤی رەنگی ب فەرمی ڤەدگەرە. وان کەرکووک فرۆت، پاشێ ژی پەرچە ب پەرچە سازیێن وێ فرۆتن.
تەرۆر و ترس: کەسێن وەکی ھاوکار جاف تەنێ ژ بەر کو رەخنە ل دیکتاتۆریا وی گرتن، ھاتن قەتلکرن. ل لالەزارێ، خوینا جوانێن کورد ھات رژاندن و ب ساخی ھاتن شەوتاندن.
تالانا ئابۆری: قاچاخچیتیا پەرەیان، دەستدانینا سەر داھاتا گومرکان، شەواتا ب گومان یا بازارا لەنگێ و ئاژاوەگێریێن ل لاجان… ئەڤ ھەموو کارێن بافل و تیما وی نە.
نوونەرێ حەشدا شەعبی یان سەرۆکێ پارتیەکێ؟
زێدەتری 40 رۆژانە کوردستان تێ بۆمبەبارانکرن، 16 شەھیدێن مە ھەنە، زارۆکێن کورد سێوی مان. لێ بافل تالەبانی ل شوونا کو حەسابا ڤێ زلمێ بپرسە، د 12ێ نیسانێ دە دەردکەڤە و ژ بەر ئێریشێن حەشدا شەعبی یێن ل سەر وەلاتێن جیران لێبۆرینێ دخوازە! ئەڤ نە تەنێ بێەخلاقییە، ئەڤ ئیخانەتا ل خوینا شەھیدانە.
بافل تالەبانی ب ڤی رەنگی نیشان دا کو ئەو نە نوونەرێ گەلێ کورد، لێ بەلێ نوونەرێ حەشدا شەعبی و کەسێن وەکی رەیان کلدانی و قەیس خەزعەلییە. ئەو دێ ژ نھا پێ ڤە ژی ب ھەمان چەتەیێن کو ھەر رۆژ ئێریشی ئاخا کوردستانێ دکن رە، ل دژی بەرژەوەندیێن گەلێ خوە تەڤبگەرە.
بافل تالابانی و یەنەکەیا ئیرۆ، ئێدی نە ئاکتۆرێن سیاسی یێ کوردن؛ ئەو ئاموورەکە شکەستینە د دەستێ نەیارێن کوردستانێ دە.
