رێڤەبەرێ کارووبارێن لەشکەری یێ ئەسەد ھاتە گرتن
وەزارەتا ناڤخوەیا سووریێ د داخویانیەکێ دە راگھاند کو د ئۆپەراسیۆنەکە تایبەت و ئەولەھی دە، وان یەک ژ ستوونێن ھەری گرنگێن رێژیما بەرێ یا بەشار ئەسەد گرتیە. ئەڤ گرتن د چارچۆڤەیا ھەولدانێن ژ بۆ جەزاکرنا بەرپرسێن تاوانێن شەر دە وەکی پێنگاڤەکە ستراتەژیک تێ نرخاندن.
لیوایێ ب ناڤێ وەجیھ عەلی ئەل-عەبد، کو ژ بۆ دەما 13 سالان رێڤەبەرێ نڤیسگەھا کارووبارێن لەشکەری یا کۆشکا کۆماری بوو، کەتە دەستێ ھێزێن ئەولەھیێ. ئەل-عەبد وەکی “سندۆقا رەش” یا بریارێن لەشکەری یێن بەشار ئەسەد دھات ناسکرن و یەک ژ وان کەسێن ھەری نێزیکی سەرۆکێ رێژیمێ بوو.
وەزارەتا ناڤخوە دا زانین کو ئەل-عەبد نە تەنێ رێڤەبەرەکی ئیداری بوو، لێ بەلێ ئەو بەرپرسێ راستەراستێ گەلەک بنپێکرنێن گران و تاوانێن ل دژی سڤیلانە کو ل سەرانسەرێ سووریێ ھاتنە ئەنجامدان. د داخویانیێ دە ھات تەکەز کرن کو ناڤێ وی د گەلەک دۆسیایێن تایبەتێن ئیشکەنجە و ئۆپەراسیۆنێن لەشکەری یێن ل دژی باژارێن سووریێ دە دەرباس دبە.
ئەڤ ئۆپەراسیۆن وەکی بەشەک ژ زنجیرەکە رێکارێن ئەولەھی تێ پێناسە کرن کو ئارمانجا وێ گرتنا ھەموو فەرماندار و بەرپرسێن پلەبلندێن رێژیما ئەسەدە. وەزارەتێ دیار کر کو ئارمانجا داوی ئەوە کو ئەڤ کەس ل بەرامبەری دادگەھێ بەرسڤا تاوانێن خوە بدن و ل گۆری قانوونان وەرن سزادان.
گرتنا وەجیھ عەلی ئەل-عەبد نیشان ددە کو پرۆسەیا پاقژکرنا سازیێن دەولەتێ و لێپرسینا ژ سەردەما بۆری ب بریارداری بەردەوام دکە.
