مەزلووم عەبدی: ژ بۆ چارەسەریا دۆسیایا دادگەھێ و زمانێ کوردی دەرفەتێ بدن دانوستاندنان
فەرماندارێ گشتی یێ ھێزێن سووریەیا دەمۆکراتیک (ھەسەدێ) مەزلووم عەبدی، دەربارێ ئالۆزی و دانوستاندنێن داوی یێن ل سەر دۆسیایا دادوەری و زمانێ کوردی داخویانیێن گرنگ دان. عەبدی بانگ ل گەلێ ھەرێمێ و ب تایبەتی ل جوانان کر کو ل ھەمبەری ئیستیفزازان ئارام بن و رێ بدن پێڤاژۆیا دیپلۆماسیێ داکو کێشەیێن ئیداری و حقووقی وەرن چارەسەرکرن.
مەزلووم عەبدی د ھەڤپەیڤینا خوە دە بال کشاند سەر “رێکەفتنا 29ێ چلەیێ” و دیار کر کو د ھەفتیێن بۆری دە ژ بەر نەبوونا میکانیزمایەکا زەلال د ناڤبەرا رێڤەبەریا خوەسەر و حکوومەتێ دە ھندەک ئالۆزی دەرکەتنە. لێ بەلێ، عەبدی مزگینی دا کو پشتی جڤینێن ل شامێ و ھەرێمێ، لھەڤکرنەک چێبوویە: دادوەرێن رێڤەبەریا خوەسەر دێ نەیێن پشتگوھکرن و پشتی دەورەیێن پەروەردەھیێ، دێ د ناڤ سیستەما دادوەری دە جیھ بگرن.
یەک ژ مژارێن ھەری ھەستیار، راکرنا زمانێ کوردی ژ سەر تەبلۆیا کۆشکا دادێ یا حەسەکێ بوو کو بووبوو سەدەما خوەپێشاندانێن گرسەیی. عەبدی ل سەر ڤێ مژارێ گۆت: “حکوومەتێ ئەڤ دەر وەکی سازیەکە سەروەریێ دیت و تەنێ ب عەرەبی نڤیساند. لێ مە ئەڤ داخواز دیسا بر سەر مێزەی. ل باژارێن وەکی کۆبانێ، قامشلۆ، دێرک و عاموودێ دێ تابلۆ ب دو زمانان بن. ژ بۆ حەسەکێ ژی، حکوومەتێ سۆز دایە کو د قۆناغەکە دن دە زمانێ کوردی ل سەر تابلۆیێ زێدە بکە.”
فەرماندارێ ھەسەدێ تەکەز کر کو سەکناندنا کارێن کۆشکا دادێ راستەراست زرارێ ددە ژیانا رۆژانەیا ملەت. وی دیار کر کو چارەسەرکرنا ڤێ دۆسیایێ ژ بۆ دەرخستنا پاساپۆرتان، قەیدا ملکان و کارێن ئیداری مینا کلیتەکێیە. عەبدی دەستنیشان کر کو دڤێت رێ ل بەر “پێڤاژۆیا ئەنتەگراسیۆنێ” نەیێ گرتن داکو پرسگرێکێن مللەتی یێن قانوونی وەرن چارەسەرکرن.
مەزلووم عەبدی د داویا داخویانیا خوە دە شانازیا خوە ب ھەستیاریا گەل یا ژ بۆ زمانێ کوردی ئانی زمان. وی جارەکە دن دوبارە کر کو ئارمانجا وان یا ستراتەژیک و ماییندە ئەوە کو زمانێ کوردی د دەستوورا نوویا سووریەیێ دە ب ئاوایەکی فەرمی وەرە چەسپاندن و پاراستن.
