ھاکان فیدان: ڤەگەرا شەری وێرانکاریێ زێدەتر دکە
وەزیرێ کارێن دەرڤەیێ ترکیەیێ ھاکان فیدان، ل پایتەختێ قەتەرێ دەوحەیێ، تەڤی سەرۆکوەزیر و وەزیرێ دەرڤەیێ قەتەرێ محەمەد بن عەبدولرەحمان کۆنفەرانسەکە رۆژنامەڤانی یا ھەڤپار ل دار خست. فیدان د داخویانیا خوە دە بال کشاند سەر گرژیێن ل ھەرێمێ و بانگ ل ئالیان کر کو ژ بۆ ئارامیا گەردوونی رێ ل بەر شەر و وێرانکاریێ بگرن.
وەزیرێ دەرڤە یێ ترکیەیێ ھاکان فیدان ئیرۆ (سێشەمێ، 12ێ گولانا 2026ێ) دەستنیشان کر کو دڤێت تەنگاڤا ھورمزێ وەکی چەک نەیێ بکارئانین. فیدان گۆت: “بکارنەئانینا تەنگاڤا ھورمزێ وەکی ئاموورەکە شەری، ھەم ژ بۆ ئارامیا ھەرێمی و ھەم ژی ژ بۆ ئابۆریا جیھانێ گرینگە. ئەم ھێڤی دکن کو ئازادیا ھاتنووچوونا دەریایی ل ڤێ تەنگاڤێ وەرە پاراستن، ژ بەر کو شەر نە چارەسەرییە و تەنێ وێرانکاریێ ب دوو خوە دە تینە.”
ھاکان فیدان ئەشکەرە کر کو پێشڤەچوونێن داوی یێن ل ھەرێمێ دھێلن کو ترکیە و قەتەر د ناڤ شێور و سەرکردایەتیەکا هێژ خورتر دە بن. ھەر وھا فیدان پشتگریا ترکیەیێ یا ژ بۆ ھەولدانێن ناڤبەینکاریێ یێن پاکستانێ ئانی زمان و گۆت: “ئەم پشتگریەکە مەزن ددن وان دانوستاندنێن کو پاکستان سەرکێشیا وان دکە. ئارمانجا مە یا ھەڤپار راوەستاندنا شەر و بدەستخستنا ئەنجامێن بەرھەمدارە.”
د بەشەکە دن یا داخویانیا خوە دە، وەزیرێ دەرڤەیێ ترکیەیێ ب توندی رەخنە ل پۆلیتیکایێن ئیسرایلێ گرتن. فیدان دەستنیشان کر کو کریارێن ئیسرایلێ ئێدی ژ سینۆرێن ھەرێمی دەرکەتنە و بوونە پرسگرێکەکا ئەولەھیێ یا گەردوونی. فیدان بانگ ل رایا گشتی یا جیھانێ کر کو ل دژی ڤان سیاسەتێن کو ئاشتیێ دخن مەترسیێ، ھەلوەستەکە زەلال نیشان بدن.
