ئەردۆگان: میت ژ بۆ لەزکرنا پێنگاڤا چەکدانینا پەکەکێ کار دکە

سەرۆککۆمارێ ترکیەیێ رەجەب تەییب ئەردۆگان راگھاند کو تەشکیلاتا ھەوالگریا نەتەوەیی یا ترکیێ (میت) ژ بۆ لەزکرنا پرۆسەیا چەکدانینا پارتیا کارکەرێن کوردستانێ (پەکەکێ) د ناڤا لڤ و تەڤگەرێ دەیە. ئەردۆگان ھەروھا ئاشکەرە کر کو ئامادەکاریێن تەکنیکی و یاسایی یێن ژ بۆ نڤیساندنا دەستوورەکە نوو، سڤیل و ئازادیخواز ب داوی بوونە و د دەمەکە نێز دە دێ پێشکێشی پارلامەنتۆیێ وەرە کرن.

سەرۆککۆمارێ ترکیەیێ رەجەب تەییب ئەردۆگان، ئیرۆ 16ێ گولانا 2026ێ د دەما ڤەگەرا خوەیا ژ کازاخستانێ دە د فرۆکەیێ دە داخویانیەک دا رۆژنامەڤانان. ئەردۆگان بال کشاند سەر قۆناغا داوی یا “پێڤاژۆیا ئاشتیێ” و دیار کر کو د ڤێ چارچۆڤەیێ دە گاڤێن وێرەک ھاتنە ئاڤێتن. ئەردۆگان وھا گۆت: “د 18 مەھێن بۆری دە مە پێشکەتنەکە بەرچاڤ ب دەست خست و ئەم ب سەر گەلەک ئاستەنگیێن ئەشکەرە و ڤەشارتی یێن ل پێشیا سیستەمێ دە زال بوون.”

ئەردۆگان دەستنیشان کر کو ئارمانجا بنگەھین یا دەولەتێ ئاڤاکرنا “ترکیەیەکە بێ تەرۆر”ە و ئەڤ سەرکەفتن دێ یەکیتیا نەتەوەیی یا 86 میلیۆن وەلاتیێن ترکیەیێ ھین خورتر بکە. سەرۆککۆمارێ ترکیەیێ ھەروھا ل سەر میکانیزمایا کاری یا پێڤاژۆیێ گۆت: “نھا دەزگەھا مە یا ھەوالگریێ (میت) ژ بۆ لەزکرنا پرۆسەیا چەکدانینا پەکەکێ کار دکە. د ھەمان دەمێ دە، ‘کۆمیسیۆنا ھەڤگرتن، برایەتی و دەمۆکراسیا نشتمانی’ یا کو د بن سیوانا پارلامەنتۆیێ دە ھاتبوو ئاڤاکرن، نەخشەرێیەکە بەرفرەھ ل سەر بنگەھا لھەڤکرنێ ئامادە کریە.”

سەرۆککۆمارێ ترکیەیێ بێیی کو ناڤێ چ ئالی یان رێخستنەکێ بدە، رەخنە ل داخویانیێن ھندەک دەردۆران گرتن و دیار کر کو ھندەک ئالی ب زانەبوون ھەولا دروستکرنا ئاستەنگیان ددن، لێ حکوومەت دێ ب بریارداری ڤێ پێڤاژۆیێ بگھینە ئەنجاما داوی. دەربارێ گوھەرتنا دەستوورا وەلات دە ژی، ئەردۆگان تەکەز کر کو دەستوورەکە نوو ئێدی ژ درووشمێن سیاسی دەرکەتیە و بوویە پێدڤیەکە نشتمانی. وی ئەشکەرە کر کو ئامادەکاریێن وان ب داوی هاتنە و ئەو دێ دەستوورەکە سڤیل، بەرفرەھ و رزگارکەر پێشکێشی گەل بکن داکو سییاسەت ئێدی داخوازێن ملەت پشتگوھ نەکە.

ئەڤ “پێڤاژۆیا نوو” د جۆتمەھا سالا 2024ێ دە ب دەستپێشخەریا سەرۆکێ مەھەپێ دەولەت باخچەلی دەست پێ کربوو، دەما کو وی ل پارلامەنێ بانگەکە سورپریز ل عەبدوللاھ ئۆجالان کربوو داکو بانگا ھلوەشاندنا پەکەکێ بکە. د ئەنجاما ڤێ نەخشەرێیێ دە، ئۆجالان د ئادار و نیسانا بۆری دە ھاتووچوونا شاندەیان قەبوول کر و د 27ێ سباتا 2025ێ دە بانگەک کر کو تێ دە داویھاتنا ستراتەژیا تێکۆشینا چەکداری راگھاند. ل سەر ڤێ بانگا فەرمی، پەکەکێ د کۆنگرەیا 12ێ یا خوەیا گشتی دە (د ناڤبەرا 4 و 5ی گولانا 2025ێ دە) بریارا داویھاتنا ل ھەبوونا خوەیا رێخستنی دا و ب ڤی رەنگی پرۆسە دەرباسی قۆناغا رادەستکرنا چەکان بوو.